Oft hefir mér blöskrað andfélagsleg hegðan míns gamla vinar Enters, en aldrei sem nú! Jú hann hefir lagst í sumbl og látið undan girndum holdsins, vissulega; hann hefir ráðist á blásaklaust fólk sem ekki hefir nokkra burði til að verjast hrokkagikkjum sem honum og nú...nú hatast hann við íslenska landsliðið í handbolta! Ég man þá tíð er sá hinn sami Enter átti sér þann draum stærstan að leika fyrir umrætt lið, þá undir stjórn Bogdans Kovalshics hins pólska. Þetta veit ég vegna þess að ég fylgdi honum á fund Bogdans sem lagði fyrir hann margvíslegar inntökuþrautir og próf. Að þeim loknum kvað hann upp þann dóm sinn að Enter ætti að einbeita sér frekar að briddsspili (sem ég hefi margsinnis reynt að fá hann til að stunda með mér) en allt kom fyrir ekki. Enter fór að skæla þar og þá og skrifaði harðorð bréf í dagblöð. Greinar eins og: "Íþrótt djöfulsins", "Fjandmaður fólksins - hinn pólski", "Handbolti sökkar!" og fleiri. Satt að segja hélt ég hann hefði sæst við þessa gömlu drauga en NEI, enn á ný þarf hann að draga þessa fallegu íþrótt, kostulegu skemmtan; þessa menningarperlu, niður í svaðið og í þetta sinn í pistli, hér á sjálfum vef Baggalúts! Er ekkert heilagt í skýjuðum augum Enters? Er hann virkilega svona mikið og barnalegt svín að hann ráðist með níði á hetjur Íslands? Sanna víkinga hinnar íslensku þjóðar sem vissulega má muna fífil sinn fegurri.