Skelfingar ósköp þarf að ræða mikið þessar ekkisens andsvítans kosningar. Rífast. Kvabba. Tuða. Grenja. Sífra. Þvæla. Í tíma og ótíma.
Hvernig nennir fólk þessu?
Er ekki miklu betra, hagkvæmara, skilvirkara, heppilegra og sársaukaminna — að láta 5-6 manna dómnefnd velja þessa aumingjans opinberu starfsmenn sem bjóða sig fram til Alþingissetu?
Svona eins og var einu sinni í Eurovision. Þegar allt var fallegra og betra.
Ég tek það skýrt fram að mig langar ekki kakóbaun í þvottabala til að sitja í þeirri dómnefnd.
Jæja.
Þá er kominn tími á lokun sjoppunnar, enda ekki skrifandi lengur fyrir frjókornaáreiti og grillfnyk.
Það er við hæfi að skella í lás á morgun, 17. júní.
Ritstjórn er á leið til Baden-Baden á slökunarbúgarð í eigu eins af velgjörðarmönnum samsteypunnar. Og mun því næst á Íslendingaslóðir í Kanada, sér til hugarhægðar og fróðleiks.
Betri stofan heldur þó göngu sinni áfram á Rás 1, alla laugardaga klukkan 18.26.
Og von er á frekara góðmeti af væntanlegri gleði- og samkvæmisskífu þjóðarinnar í byrjun júlí.
Netsvæði Baggalúts opna aftur í lok sumars.
» Sálmar | » Gagnrýni | » Sögur | » Leikrit | » Siðir | » Heimsljós
