Hvað er eiginlega um að vera? Maður má ekki fá sér lítinn kríublund án þess að allt fari í kaldakol hér á ritstjórn?
Páskahelgin tók óvenju mikið toll af mér í ár (vegna þrotlausrar vinnu minnar) og því ákvað ég að leggja mig örlítið í sófanum í setustofu ritstjórnar. Þegar ég síðan vaknaði var allt orðið grænt. Og ég meina allt. Til að byrja með sá ég ekkert, enda höfðu lonníetturnar mínar verið málaðar grænar. Þegar ég loksins náði að þrífa mestu málninguna af þeim og leit í kringum mig sá ég að búið var að mála setustofuna græna, svo og allt í henni (og ég meina allt).
Í fyrstu hélt ég að hér væru prakkararnir í Vinstri-Grænum á ferð, en svo sá ég mér til mikillar hrellingar að á veggjum héngu framboðsplaköt Framsóknarflokksins. Framsókn! Er það eitthvað ofaná brauð?!
Alveg er ég viss um að Myglar hefir eitthvað með þetta að gera, bölvaður...