Falsað verk

Umfreður Kristjánsson forvörður sagði í gær að málverk, sem sagt var eftir Rafn Th. Scramban málara og selt sem slíkt á vegum Gallerís Lakkrís árið 1997, væri greinilega ekki eftir listamanninn. Verkið var ágreiningsefni í "Klessumálinu" svokallaða, meiðyrðamáli sem eigendur Gallerís Lakkrís unnu gegn blaðamanni Baggalúts, sem dregið hafði í efa að málverkið væri eftir Scramban.

Þetta sagðist Umfreður geta fullyrt eftir að hafa skoðað málverkið. Sagði hann greinilegt að hér væri um ljósrit að ræða og það fremur lélegt.

Starfsmenn Gallerís Lakkrís vildu fátt um málið segja, en sögðust þó hafa haldbærar sannanir fyrir því að Scramban hefði ljósritað verkið sjálfur og því væri það tæknilega séð hans höfundarverk.

Landsmenn gera sitt besta til að taka til, en það gengur erfiðlega

Undanfarið hefur nokkuð borið á því að allskyns drasli sé fleygt úr flugvélum sem fljúga yfir Afganistan (sem er fjölmennt ríki í Asíu). Í samtali við Baggalút sagði Ibn Sigfússon: "Þetta hófst fyrir u.þ.b. mánuði, en flugumferð hefur aukist gríðarlega yfir landinu síðan - sennilega vegna einhverra nýrra samninga. Svo virðist sem þetta fólk líti á landið sem einhvers konar ruslakistu - við erum að finna matarleifar og alls kyns óþverra í gulum ruslapokum út um allt. Þetta er náttúrulega óþolandi."

Ibn taldi jafnvel að einhverjar skemmdir hefðu orðið á mannvirkjum vegna þessa, en efaðist um að slys hefðu orðið á mönnum. "...engu að síður verður þessu að linna, þurfum við að bíða eftir því að einhver slasi sig til að mennirnir sjái að sér?"

Skip að veiðum á Tjörninni

Sjávarútvegsráðherra hefur gefið út yfirlýsingu þess efnis að kvótalitlum smábátum sé heimilt að veiða utan kvóta í Reykjavíkurtjörn.

Nokkrir smábátaeigendur gripu tækifærinu fagnandi og hófu veiðar þegar í stað. "Þetta er búið að vera helvíti lélegt í dag, bræla og leiðindi, en við erum bjartsýnir og munum reyna annars staðar á svæðinu strax í fyrramálið," sagði Ellert Hergrímsson, sem hóf veiðar upp úr hádegi í dag.

Aðspurður um hvort einhvern fisk sé að hafa í tjörninni sagði Árni M. Mathiesen: "Við höfum sterkar vísbendingar um góðan árgang af marfló á svæðinu." Þess má geta að Hafrannsóknastofnun vinnur nú að skýrslu um svæðið en það hefur fram að þessu verið lítið nýtt til veiða.

"...svo er aldrei að vita nema við sleppum nokkrum laxaseiðum útí, svona fyrir jólin," bætti Árni við sposkur á svip.

Gólan í stuði.

Einstakur atburður átti sér stað í síðasta mánuði þegar afrískur bavíani að nafni Gólan sigraði á sterku skákmóti í Vín í Austurríki. Með sigrinum uppfyllti hann skilyrði Alþjóða skáksambandsins fyrir stórmeistaratitli. Gólan sigraði í öllum skákum sínum og var með langflesta vinninga að keppni lokinni.

Aðspurður sagði fjölmiðlafulltrúi Sambandsins að árangur Gólans sýndi enn og aftur að skákíþróttin væri opin öllum vitsmunaverum, en stutt er síðan konur fóru að hasla sér völl á þeim vettvangi.

Ekki eru þó allir jafn ánægðir með árangur Gólans. Ónefndur stórmeistari sem fréttastofa Baggalúts náði tali af, að afstöðnu mótinu í Austurríki sagði: „Svo virðist sem eigandi apans hafi þjáfað hann til að ráðast á andstæðinga sína reyni þeir að hreyfa við nokkrum manni á borðinu. Enginn keppandi þorði annað en að gefast strax upp ellegar falla á tíma eftir að hafa séð hvernig skrímslið lék fyrsta andstæðing sinn.“

Ekki náðist í Gólan við gerð þessarar fréttar.

Bernharð Harðarson heldur í dag fyrirlestur á vegum Háskóla Íslands um heimsmynd Færeyinga í Hátíðarsal, Aðalbyggingu. Þar verður velt upp spurningunni sem brennur mjög á Íslendingum um þessar mundir: "Af hverju hata þeir okkur?" Fjallað verður um hugtakið "spæligleði" og kannað hvernig og í hvaða tilgangi þessu hugtaki var beitt á 20. öld. Þá verður rætt um hvaða leiðir eru fýsilegar til að sporna við frekari hryðjuverkum Færeyinga á íslenskri grund.

Hinn lágkúrulegi auglýsingasnepill "Fréttablaðið", sem landsmenn fá nauðugir viljugir í hausinn á hverjum einasta morgni, hefur séð sig tilneyddan til að ráðast óvægið á Baggalút og ritstjórn hans. Þann 23. október (bls. 22) er í blaðinu greinarkorn þar sem Baggalútur er sakaður um að flytja upplognar fréttir! Orðrétt stendur: "Vefsíðan Baggalútur hefur að geyma upplognar fréttir af málefnum líðandi stundar..."

Það kemur ritstjórn Baggalúts síður en svo á óvart að slíkur rógburður sé prentaður í Fréttablaðinu, enda þekktur hatursmaður Baggalúts sem öllu ræður á þeim bæ. Það er enginn annar en stórútgerðarmaðurinn Hafþór Hübner, sem stjórnar Fréttablaðinu bakvið tjöldin og kaupir sjálfur allar "auglýsingarnar" í því. Hafþór hefur ítrekað reynt að fá ljóðin sín útgefin hjá Baggalúti, en alltaf fengið afsvar.

Ingibjörg og Eyþór fyrir framan höfuðstöðvar Íslandssíma

"Þetta lítur bara vel út hjá þeim," sagði Ingibjörg Sólrún Gísladóttir eftir að hafa kynnt sér húsakynni Íslandssíma, en í gær gaf borgarverkfræðingur út viðvörun um að húsnæði fyrirtækisins væri að hruni komið.

"Þetta er alger vitleysa," sagði Eyþór Arnalds í samtali við Baggalút. "Við erum búnir að vera að dytta að ýmsu nú í vikunni og þorum að fullyrða að húsið hefur aldrei verið í betra ásigkomulagi, klósettin eru meir að segja farin að virka sæmilega."

Ennfremur sagðist Eyþór vongóður um að fá fljótlega símtengingu í húsið með "...ofsalega hraðri tengingu" og vísar um leið á bug sögusögnum um bága fjárhagsstöðu fyrirtækisins.

Veiðin var ágæt þrátt fyrir skakkaföllin

Björgunarsveitirnar Gerpir á Hellisbarði og Hnellir á Blámundarnesi komu síðdegis í dag rjúpnaskyttu til bjargar sem hafði slasast nokkuð í veiðiferð sinni á Hnísuheiði eystri. Maðurinn, sem var einn á ferð ásamt þremur hundum sínum stakk sig í vinstri þumalfingur á gaddavír þar sem hann prílaði yfir girðingu. "Ég var að fara yfir girðinguna við Þvernessgeil og ýtti girðingunni niður sísvona eins og maður er vanur að gera þar sem ekki er hlið. Þá skipti engum togum að einn gaddurinn í gaddavírnum stakkst í þumalinn á mér. Þetta var soldið vont og það kom blóð og allt", sagði skyttan, sem vill helst ekki láta nafns síns getið. Að sögn Svavars Long, aðgerðarstjóra björgunarsveitarinnar Gerpis, var maðurinn nokkuð vel haldinn þegar komið var að honum eftir um hálftímaleit. "Við vorum að fylgjast með honum út um gluggann á höfuðstöðvunum, enda maðurinn afburðaskytta, þegar við sáum að hann stakk puttanum upp í sig. Þá stóð okkur ekki á sama og við ákváðum að kalla út allt tiltækt lið, auk aðstoðar frá Blámundarnesi. Aðgerðin sem slík tók um hálftíma, við hefðum þó reyndar bjargað honum fyrr ef við hefðum ekki þurft að koma við á bensínstöð og kaupa rúðupiss. Við hlúðum að manninum þegar við komum að honum og settum plástur á puttann".

Steingrímur Jamal í pontu

Steingrímur J. Sigfússon hvatti í setningarræðu sinni félaga sína á Alþingi að skerða ekki skegg sitt. Hann sagði það vera áhyggjuefni að forysta landsins væri upp til hópa skegglaus og gæti það "...alið á fordómum og skert traust alþjóðasamfélagsins á íslensku stjórnkerfi."

Steingrímur hvatti ennfremur til að þingmenn sneru í austur á þingfundum og ennfremur væri rétt að þingkonur hefðu einungis eitt sameiginlegt atkvæði á þingfundum "til bráðabirgða".

Þá tilkynnti Steingrímur að hann vildi hér eftir vera kallaður Steingrímur Jamal.

'Kókaín'

"Ég held að hér sé engin hætta á ferðum, hér er um sárasaklaust efni sem notað er við stífluðu nefi. Viðbrögð lögreglunnar vil ég þó ekki setja út á, þau eru skiljanleg og eðlileg miðað við það andrúmsloft sem við nú búum við," segir Pablo Escobar, dreifingarstjóri "Kókaínsamtaka Kólumbíu" (KK), en lögreglan hefur hvatt fólk, sem fær sent svonefnt "Kókaín", að sýna fyllstu aðgæslu. Innpakkað umslag, sem barst á Vog, hafði að geyma torkennilegt hvítt duft, sem sagt var að hugsanlega kynni að innhalda miltisbrandsgró. Lögreglan segir að í ljósi atburða síðustu daga sé ástæða til að taka á málinu af fullri alvöru þar til annað kemur í ljós.

"Þetta er eðlilegur ótti miðað við það sem átt hefur sér stað. Alls sendum við út 900.000 kíló í viku hverri en í aðeins 9 tilvikum hefur fólk kvartað, að meðtöldu atvikinu í Reykjavík. Við hvetjum alla sem eitthvað óttast til að leita til læknis, en ég ítreka að efnið í umslögunum er sárasaklaust, það hefur m.a. verið staðfest með rannsókn spænsku lögreglunnar, þeir voru bara mjög hressir með þetta" sagði Escobar og hló.

Guðni var tilbúinn að leggja nokkuð á sig til að fá hlutverkið

Aðdáendur Guðna Ágústsonar, landbúnaðarstjörnu, urðu trúlega fyrir vonbrigðum á dögunum þegar tilkynnt var að hann kæmi ekki til greina sem næsti Bond.

Framleiðendur myndarinnar gáfu frá sér yfirlýsinguna þegar þær raddir urðu æ háværari að Guðni myndi feta í fótspor ekki ómerkari manna en Sean Connery, Roger Moore og Woody Allen.

Guðni hefur verið næstum jafn þekktur fyrir fagurt útlit sitt og limaburð og afrek á stjórnmálasviðinu.

Guðni fór með lítið hlutverk í kvikmyndinni 'Muppets take Manhattan' ásamt því að hafa reynt fyrir sér sem fyrirsæta.