Coalblack and Da Sebben Dwarfs var gerð af Warner Brothers árið 1943 undir þeim merkjum að vekja upp djörfung og dug í hjörtum "afríkansk-ættaðra ameríkana" og fá þá til að skrá sig í herinn í tugþúsundavís. Bob Clampett leikstjóri myndarinnar valdi þá leið að gera uppdjassaða útgáfu af Mjallhvíti og Dvergunum 7; slá tvær flugur í einu höggi. Ekki aðeins kynda upp meðal svartra heldur einnig gera paródíu af nýútkominni teiknimynd Disneys um
Mjallhvíti.

Bob og félagar rúntuðu frá einum djassklúbb í annan kvöld eftir kvöld, drukku í sig svarta menningu eins og þeim einum var lagið og hrærðu síðan saman brjálæðið sem er Coal Black And De Sebben Dwarfs.
Útkoman er tryllingsleg þeysireið af rasisma og dúndrandi djassi þar sem Mjallhvít, sem í þessari útgáfu heitir So' White (en ekki Coal Black ..?) tiplar um í hotpants hengjandi upp nærbuxur og reynir að snúa á vondu nornina (sem er "Jus' as Riiiich as she wus mean!") eftir að Nornin kallar til "Murder Inc." til að "Black Out-a So' White".

Ég ætla ekki að fara of mikið í gang myndarinnar, leyfi heldur lesendum að njóta hennar sjálfir og skil því link á myndinni eftir hér í enda greinarinnar.
Teiknimyndin er rúmlega 8 mínútur, en hraðinn gerir það að verkum að manni líður eins og maður sé búinn að horfa á þriggja tíma epískt stórverk. Svo má ekki gleyma því að öll samtöl myndarinanr ríma, enda þéttofin við stórkostlega djasstónlistina sem kyndir undir myndinni.
Hvort hún hafi fengið einhverja svarta til að þeytast í herinn veit ég ekki, en ég leyfi lesendum að dæma fyrir sjálfa sig hvort myndin kveiki í þeim ameríska þjóðerniskennd.

http://www.nfmh.is/~atlividar/video/Coal Black_And_De_Sebben_Dwarfs.mpg
Coal Black and De SebbenDwarfs[ 79mb innanlands]