Jæja. Þá er hann Magni okkar skilinn. Að minnsta kosti stendur það ritað svart á hvítu í DV. Þar er nefnilega birt yfirlýsing frá Magna og hans fallegu konu, þess efnis að þau hafi slitið samvistum. Ástæðan er skyndilegur bráðaframi Magna - sem í kjölfarið var útnefndur austfirðingur ársins og meiraðsegja heiðraður sérstaklega af hreppsnefnd Borgarfjarðarhrepps.
Þau ætla bæði að ala upp son sinn, Marínó - sem er alls ekki sjálfsagt þegar rokkstjarna á í hlut. Gott að vita til þess.
En spurningin sem brennur á íslensku þjóðinni - gott ef ekki heimsbyggðinni allri er hinsvegar þessi: Hvað verður um allar fínu mubblurnar sem við sáum svo eftirminnilega í Innliti-útliti? Að ekki sé minnst á sjálfa eldhúsinnréttinguna! Fá þau sameiginlegt forræði yfir henni? Eða verður Magni að láta sér nægja að vaska upp aðra hverja helgi?