Lesendur heilir.

Í dag bárust fréttir af því að menntamálaráðherra, borgarstjóri, fjármálaráðherra og samgönguráðherra hefðu gert með sér samkomulag um að eyða 6.000.000.000 króna í byggingu tónlistarhúss við Reykjavíkurhöfn. Sex milljörðum! Sex þúsund milljónum sem á að kasta á bál hinnar opinberu umsýslu. Ráða eitt stykki Árna Johnsen til að kaupa inn og skipa svo eitt stykki þjóðmenningarhússstjóra til að reka batteríið. Bruðla hér og spreða þar. Og til hvers? Til að hér sé hægt að leika tónlist í stóru húsi, með bílageymslu og rúmgóðu fatahengi. Opinberu tónlistarhúsi hins íslenska ríkis. Loksins verður hægt að flytja ódauðlega klassíska tónlist, loksins hægt að raula heimsins bestu óperur loksins hægt að hlusta á Didda fiðlu og Garðar Cortez - báða í einu, loksins hægt að afhenda íslensku tónlistarverðlaunin í STÓRUM sal, loksins hægt að halda Heimilissýninguna annarsstaðar en í Laugardalshöllinni, loksins hægt að taka á móti Rolling Stones. Og þó. Í Kópavogi er prýðisgott tónlistarhús þar sem Diddi og Garðar syngja reglulega, íslenska óperan er staðsett í besta leikhúsi bæjarins, Háskólabíó rúmar Synfóníuhljómsveitina ásamt fáeinum kórum samtímis, Heimilissýningin er mjög vel staðsett í Höllinni og Íslendingar eru of blankir og fáir fyrir Stones. Hvað er þá að? Jú sjáið til, okkur vantar nefnilega hús á HEIMSMÆLIKVARÐA. Hús sambærilegt við óperuhúsið í Sidney og Þúsaldarhvelfinguna í Lundúnum. Hús þar sem hægt er að stinga í samband hljóðnemum á klósettinu og heyra allar heimsins saumnálar detta á salargólf lagt sérlega hljóðeinangrandi viðarborðum frá Amazon.

Við erum bjánar. Við látum bjóða okkur þetta á heimsmælikvarða og hitt sem jafnast á við það sem gerist best í útlöndum, án þess að velta því fyrir okkur hvers við þörfnumst í raun og veru. Við þurfum að byggja leikskóla, elliheimili, borga mannsæmandi laun, efla heilsugæslu, bæta almenningssamgöngur, draga úr mengun ... - Reyndar myndu sex þúsund milljónir hrökkva skammt til allra þessara verkefna, en það væri þó byrjun.

Góðar stundir.

Sendu Núma póst