Jahá! - á nú að fara í boltaleik? Á nú að sperra sig og fara til útlanda, skreppa í smá víking? Á nú enn og aftur að hafa saklausa þjóðina að ginningarfífli og blábjána? Jahá, nú á sko að fara að spila handbolta - og sýna það - í sjónvarpinu mínu !
Viljum við í alvöru horfa á íslenska drengi verða að athlægi? drengi sem gætu hæglega setið á skólabekk og orðið gegnir þegnar. Er þess í stað nauðsynlegt að brjóta niður sálir þeirra í fæðingu og niðurlægja þá? Er það þarft - er það hinn sanni íþróttaandi?

Ég hatast við handbolta, ég blána og grána við tilhugsunina eina! Mér verður líkamlega illt, ómótt, flökurt og oftlega bubult þegar ég sé mann taka upp svo mikið sem appelsínu í stórmarkaði og munda hana. Ekki það að hreyfing sé af hinu illa - neinei, ég er hallur undir hvers kyns sprikl, innanhúss sem utan - en, elsku hjartans Íslands börn - við erum hér að tala um handbolta, íþrótt djöfulsins - knattleik kölska. Ekki nóg með að engin sómakær þjóð spili þennan viðbjóð af mannúðar- og siðferðishvötum - nei það sárnar mér ekki. Það sem ég aftur kyngi seint og illa...er að við getum andskotann ekkert í handbolta!!

Þið vitið kæru landar - eða ættuð að vita - að eina ástæðan fyrir því að þessi mygla þrífst innan íþróttaheimsins, eina lífsvon hennar - er sú að Íslendingar horfa á handbolta. Ó já, óhóhó jahá! Haldið þið að sjónvarpsréttur af EM í handbolta sé keyptur til margra landa? Er bitist, kýtt og klórað um þau forréttindi að sýna þetta skítkast, eins og ég leyfi mér stundum að kalla hroðann. Nei, Íslendingar eru eina þjóðin í gjörvöllum heiminum sem kaupir aðgang að þessum skrípaleik, aðrar þjóðir fá þetta gefins og sýna á undan barnaefni, gjarnan á miðvikudagsmorgnum.

Landsmenn - mér er svo hræðilega heitt í hamsi að ég verð að bindast orða. Ég vil bara biðja ykkur um eitt - og aðeins eitt. Slökkvið - í guðs bænum slökkvið!!!