Lesbók09.04.15 — Enter

Hún Margrét Þórhildur Danadrottning fagnar 75 ára afmæli sínu þann 16. apríl. Til hamingju með það.

Eins og mig langar nú til að gleðjast með henni og prinspuntinu hennar, honum Hinriki, þá get ég ekki orða bundist.

Hvernig getur þokkalega sómakær lýðræðisþjóð réttlætt það að hafa þessi erfðaóbreyttu himpigimpi ennþá hangandi yfir sér?

Þetta er gersamlega á ská og skjön við allt það sem upplýstri þjóð ætti að vera heilagt. Óréttlátt, fokdýrt og úr sér gengið erfðaveldi, uppskrúfað og ömurlegt. Byggt á kúgun og kóngarunki, sem ekkert skilur eftir sig nema glingur og gullslegin bollastell — og fábjánalegar fasteignir með ótölulegum fermetrafjölda.

Þetta er ekkert annað ríkisrekinn sirkús með fokdýrum ráðvilltum sýningargripum, hverjum undan öðrum. Fordekrað hyski með allt of löng nöfn, sem fæðast inn í einhverja undarlega nábleika sápukúlu, sem svífur um fyrir ofan lýðræðið og enginn þorir að sprengja.

Og þetta er ekki bara í Danmörku, þetta lið er út um allt. Eins og veggjalýs með langtímaleigusamning. Bretland, Noregur, Svíþjóð. Þetta eru ekki einhverjar flippþjóðir eins og Norður–Kórea og Bahrain. Þetta eru lönd sem vilja láta taka sig alvarlega á alþjóðlegum vettvangi.

Kommon.

Að halda konungsfjölskyldu í lýðræðisríki er eins og að slátra pandabirni í húsdýragarðinum á haáannatíma. Blóðug hrefnusteik í hvalaskoðun. Heróín í barnaafmæli. Hlé í bíó.

Þetta er svo taktlaust. Svo rangt. Svo gersamlega siðlaust. Og sturlað.

Til hamingju með afmælið Magga mín. Farðu nú að fá þér heiðarlega vinnu.

 
Númi Fannsker — Sálmur
 
Enter — Sálmur
 
Enter — Sálmur
 
Númi Fannsker — Sálmur
 
Númi Fannsker — Sálmur
 
Enter — Sálmur
 
Enter — Sálmur
 
        1, 2, 3 ... 180, 181, 182