Hermt er að lögregla hafi gómað tvo stöðumælaþjófa, alþjóðlega (ekki fylgir sögunni hversu alþjóðlega).

Munu lagaverðir hafa lagt hald á ríflega hundrað þúsund krónur í skiptimynt hjá óþokkunum, íslenskar. Á annað hundrað þúsund krónur!

Nú ætla ég ekki að verja gjörðir þessara alþjóðlegu ólánsmanna, en þó hlýtur maður að þakka það einstaka traust sem þeir sýna okkar fársjúku krónu með þessu framtaki sínu.

Hugsið ykkur bara; að skælast hingað norður í íshaf, með rándýru flugi, kúldrast á fokdýru gistirými, maulandi dýrasta fæði á byggðu bóli – til þess eins að dýrka upp fáeina stöðumæla og næla sér í óstöðugustu skiptimynt samtímans.

Mér finnst vel athugandi að splæsa fálkaorðu í þessa pörupilta.