Nú verður maður að passa sig að fara ekki með fleipur, en mig minnir að í fyrra hafi Náttúrufræðistofnun Íslands (NÍ) komið með þá tillögu að banna sölu á rjúpu. Siv Friðleifsdóttir umhverfisráðherra tók undir þetta og bar fram tillögu þess efnis fyrir umhverfisnefnd Alþingis.

Sú tillaga var hinsvegar skotin í kaf af umhverfisnefndinni, aðallega til að pirra Siv eða út af einhverjum pólitískum leik, þótt rökin fyrir banninu hafi verið góð. Með því að banna sölu á rjúpu væri verið að koma í veg fyrir að stórtækir veiðimenn, gætu selt sínar rjúpur. Þess ber að geta að þessir stórtæku veiðimenn eru um 5% allra veiðimanna og veiða um 50% veiðinnar. Með því að banna mönnum að selja rjúpu, mætti því draga úr veiði um allt að 50% og samt leyfa 95% veiðimanna að halda áfram óskertum veiðum.

Fyrir vikið ákvað Siv að ganga enn lengra og afturkalla veiðileyfi á rjúpuna (ath. allir fuglar eru friðaðir, en gefið er út sérstakt leyfi um fuglaveiðar af Umhverfisráðherra). Þetta er í raun aðdáunarvert framtak hjá Siv og reyndar í eina skipti sem hún hefur gert eitthvað að viti, að mínu mati. En út af þessum pólitíska skrípaleik er öllum rjúpnaveiðimönnum bannað að veiða rjúpu, allir þurfa að líða fyrir þrjóskuna í þingmönnum en ekki bara þessir örfáu magnveiðimenn.

Nú er NÍ aftur komin á stúfanna og komnir með tillögur um að banna sölu á gæs, með svipuðum röksemdum. Ég er fullkomlega sáttur við þær tillögur, eins og ég var við tillögur um bann við sölu á rjúpu. Nú skulum við bara vona að sagan endurtaki sig ekki og að hér verði komið á allsherjar gæsaveiðibann.