Aldrei átti ég von á því að ég eignaðist plötu aftur á þessum dögum sem ég get hlustað á aftur og aftur án þess að fá leið á henni eins og gerðist oft þegar ég var unglingur. Þetta eru albúm með lögum sem eru ekkert sérstaklega grípandi við fyrstu hlustun en svo þegar hlustað er oftar fer maður að heyra fleiri og fleiri fallegar laglínur í kraðakinu og greinlegt er að góð vinna hefur verið lögð í uppbyggingu og útsetningu á lögunum. Undanfarin 10 - 15 ár hef ég verið ákaflega latur að fylgjast með því sem er að gerast í popp og rokktónlistarheiminum og þeir fáu diskar sem ég hef keypt undanfarið eru bara ekkert sérstakir. Sem segir manni hvað það skiptir miklu máli að lesa sig til og fræðast um það sem er að gerast, til að gera bestu kaupin.

Fyrir rúmu ári niðurhalaði ég frá eMusic.com, eftir meðmælum þar, albúminu The Loon sem er fyrsta stóra plata hljómsveitarinnar Tapes n'tapes frá Minneapolis í USA. Fyrst niðurhlaði ég einu lagi, hmmm... bara gott, svo niðurhalaði ég því næsta... og svo bara allri plötunni. Alltaf líkaði mér betur við plötuna og það kom mér ekkert á óvart að Moggin sem aldrei lýgur sagði í haust að líklegast hafi þessi plata verið ein af þeim bestu sem gefin var út árið 2006. Því næst skutlaði ég henni á disk og hefir verið að hlusta á hana ótrúlega oft miðað við að hér er ósköp venjulegt, gamaldags nýbylgjupopp/rokk á ferðinni. Ætli að það kallist ekki indie í dag?

Það sem gerir plötuna góða er að hún er geysilega heilsteypt að mínu mati. Öll lögin eru góð og eins og framhald að hverju öðru. Enginn ofursmellur sem eyðileggur heildarmyndina. Sándið er skemmtilega gamaldags við fyrstu hlustun en við frekari hlustun er maður er alltaf að koma meira og meira eyra á eitthvað sniðugt í lögunum hvort sem það tilheyrir sándinu eða útsetningu. Það besta við þessi lög er að hljómsveitarmeðlimir eru svo duglegir að variera sína frasa. Það er ekkert verið að hamra nákvæmlega eins á sínum stefum eða trommutakti, heldur verið að gera lögin fersk frá byrjun til enda.

Svo mörg voru þau orð. Þakka þeim sem hlýddu.

http://www.youtube.com/watch?v=N5g2eUh7TWE