Ferðin byrjaði ekki vel, þar sem fluginu seinkaði um rúma 3 tíma. Ég komst þó á staðinn og var á endanum sóttur, en kvöldverðurinn fór fyrir lítið þar sem við komumst ekki á leiðarenda fyrr en um miðnætti.
Íbúðin var í aldargömlu húsi með jafngamalli lyftu, steinsnar frá þinghúsinu og Dóná. Íbúðin var rúmgóð og björt með 4m lofthæð, en kommarnir höfðu samt klippt hana í tvennt þar sem þeir töldu að engin fjölskylda hefði gott af meira en 3 herbergjum. Ég var reyndar látinn sofa á dýnu á gólfinu eins og hundur, en vistin var að öðru leyti góð.

Daginn eftir var farið í skoðunarferð um Búðapest þar sem öll helstu kennileiti borgarinnar voru skoðuð, ásamt kvöldgöngu um flóðlýstar byggingarnar við Dóná, en fátt annað markvert gerðist þann daginn.

Á laugardeginum var svo farið út fyrir borgina. Fyrst var farið til Esztergom, þar sem ein stærsta basilika Evrópu stendur. Esztergom er við landamæri Slóvakíu, en Slóvakía er gagnrýnd í öðru félagsriti. Þaðan var farið til bæjarins Szentendre sem er gamaldags bær með þröngum strætum og stórt marsipansafn þar sem Michael Jackson er í fullri stærð.
Í kvöldmat steikti móðir stúlkunnar handa okkur villigölt sem dýralæknirinn eiginmaður hennar hafði \"skotið\". Engum varð meint af svo að ég ákvað að vera ekkert að véfengja það.

Á sunnudeginum var farið í tyrkneskt baðhús á Hótel Gellért. Hluti þeirra var kynjaskiptur og í karlahlutanum fengum við lendaskýlu í stað sundskýlunnar. Mjög frelsandi allt saman.
Þaðan var gengið upp á Gellért hæð og helliskapellan var skoðuð. Eftir hressandi göngutúr bauð faðir stúlkunnar okkur til hádegisverðar og eftir það var rölt um Margharet eyju. Þar fékk ég heimanmund, 1.5 l ómerkta flösku af einhverju sem hann kallaði rauðvín, ásamt meira áfengi og öðru smálegu.

Á mánudeginum fórum við svo á fætur fyrir allar aldir og brunuðum út á flugvöll til þess eins að komast að því að vélinni hafði seinkað. Alls varð seinkunin tæpir 4 tímar, og fá Heimferðir litlar þakkir fyrir.

Allt í allt var þetta stórgóð ferð og því gef ég borginni 5 stjörnur.