Ég nördaðist til að leigja fyrstu fjóra þættina í endurgerðri seríu á Battlestar Galactica.

Eldri serían kom út í kjölfar Stjörnustríðsfársins á síðari hluta áttunda áratugarins. Vonir stóðu til að þetta yrði Stjörnustríð sjónvarpsins. Það gekk ekki og var framleiðslu hætt í miðri seríu. Þættirnir öðluðust hins vegar gríðarmikinn költstatus í Bandaríkjunum og síðar hér á landi.

Eitt sinn tók ég þessa þætti (eða þá fyrstu) til að sjá hvaða læti þetta voru. Niðurstaðan var sú að þessir þættir voru álíka heillandi og fimm mánaða gamalt gubb. Tæknibrellurnar voru fínar, búningarnir fínir, allt mjög Stjörnustríðslegt, en söguþráðurinn var algerlert rusl og það stóð ekki steinn yfir steini í því (jafnvel séð út frá "innri lógík" kvikmynda/þátta). Afburðaléleg skrif eyðilögðu því þáttinn. Ég get vel skilið að bandarískt fólk sem sá þættina þegar það var átta ára í USA finni til einhverrar nostalgíu, en að það skuli hafa verið fólk hér á landi sem sá þessa þætti aldrei sem börn sem "dýrkar" þessa þætti er ekkert annað en hrein sýndarmennska í nördisma. Það er bara ekki hægt að líka við þessa þætti.

Þess vegna var ég fullur efasemda þegar ég og félagi leigðum þessa nýju útgáfu, létum þó til leiðast í ljósi þess að áreiðanlegir aðilar (þ.e. nördar með sjálfstæða hugsun, ekki þykistunördar sem þykjast dýrka eitthvað af því að þeir halda að það falli í kramið hjá nördum) höfðu mælt eindregið með þessu.

Niðurstaðan er sú að þetta eru frábærir þættir (það sem af er). Tæknibrellur, útlit og allt það er mjög vel gert. Það er hins vegar aukaatriði. Aðalatriðið er handritið og það slær í gegn. Allt það sem fór úrskeiðis í fyrri seríunni er lagað og endurbætt til muna. Þessir þættir verða líka að teljast einstakir miðað við vísindaskáldsöguþætti en það felst í dramatíkinni. Í þáttunum eru teknar erfiðar og ógeðfelldar ákvarðanir sem eru á verulega gráu svæði siðferðilega. Slíkt myndi aldrei sjást í Star Trek. Karakterarnir eru heldur ekki svart/hvítir litleysingjar, þeir eru margbrotnir og flóknir. Slíkt myndi aldrei sjást í Star Trek. Óvinirnir sigra. Slíkt myndi aldrei sjást í Star Trek.

Þetta eru þvi virkilega góðir þættir (það sem af er). Ég hlakka mikið til að horfa á afganginn.

Þetta fæst auðvitað hjá Larrý í Laugarásvídeó og ég hvet alla nörda til að leigja þættina.