Ég er svo heppinn að vera í góðum saumaklúbbi. Við félagarnir hittumst á hverju föstudagskvöldi, saumum út, prjónum, drekkum hvítvín og það sem mest er um vert – við ræðum tilfinningar okkar, vandmál, langarnir og þrár.

Gummi er að ganga í gegnum erfitt tímabil í hjónabandinu sínu; konan hans er orðin áhugalaus um kynlíf og Gummi vinur er dauðhræddur um að hún sé búin að finna sér annan karl. Að sjálfsögðu getum við ekki beinlínis leyst þetta vandamál Gumma en við erum þarna til staðar fyrir hann þegar hann vil tala, gráta eða bara sitja og þegja. Við erum vinir hans og okkur þykir vænt um hann; við gefum góð ráð.

„Strákar, ég verð að fá ráðleggingar hjá ykkur,“ sagði Gummi. „Inga hefur breyst svo mikið og ég veit ekki hvað er að.“

„Allt í lagi Gummi minn,“ sagði Óli pípari. „Ef við getum hjálpað, þá gerum við það. Hvernig hefur hún breyst vinur?“

„Hún hefur bara ekki áhuga á kynlífi lengur. Eins og þetta var nú fjörugt hjá okkur bara í fyrra; hlutverkaleikir, léttar bindingar og bara allt sem okkur datt í hug. Nema rassinn, ég hef aldrei mátt koma nálægt honum.“ Við kinkuðum allir kolli. Enginn okkar fær það hjá sinni konu og af tillitssemi erum við allir löngu hættir að biðja um það og það er útrætt mál í okkar saumaklúbbi.

„Veistu Gummi minn,“ sagði Kalli, “við Jóna lentum í svipuðu vandamáli í hitteðfyrra – sko áður en við fluttum hingað – og ég leysti það með hjálp strákanna á Patró. Þetta snýst um að blása í glæðurnar, fá eldinn upp aftur. Bjóddu henni út að borða, fariði í bíó, sexí undirföt, utanlandsferð eða bara hvað eina sem ykkur langar til að gera. Ég lofa þér að þetta virkar.“

„Takk vinur, ég prufa þetta. En hvernig veistu þetta allt?“

„Ég er áskrifandi að Vikunni. Fínasta blað sem er fullt af lausnum fyrir okkur. Í nýjasta blaðinu er listi með vísbendingum um að konan sé farin að halda framhjá þér. Ég skal lána þér blaðið á morgun Gummi minn.“

„Ég er með það Kalli,“ sagði Binni á Brautinni. „Svakalega fín lífsreynslusagan af manninum sem komst að því að konan hans var líka gift þýskum bisníssmanni. Sæktu bara blaðið til mín á morgun.“

Svona er dæmigert kvöld í saumaklúbbnum mínum - svo gefandi.