Alltaf þegar ég heyri minnst á þetta fyrirtæki, Innrömmun Sigurjóns, finnst mér eins og það hljóti að vera staður sem maður getur farið með Sigurjón á og látið ramma hann inn. Sigurjón er þá væntanlega strekktur rækilega út í öll horn og allar hliðar sterklegs ramma þannig að hann haldist þar strekktur meðan hann er hengdur upp á vegg og helst alla tíð síðan.

Nú veit ég ekki hvort þeir rammi Sigurjón inn klæddan eða nakinn en sé hið síðarnefnda tilfellið þarf væntanlega að sauma frekar djúpt í holdið sem hlýtur að vera býsna sárt fyrir Sigurjón - ja - nema þeir rammi hann inn dauðan. Innrömmun Sigurjóns heitins. Dauðrömmun hefur líka þann kost að hvorki þarf að fóðra hið innrammaða veggskraut né moka undan því. Lífrömmun er þó ugglaust... ja... líflegri.

Þetta hlýtur að vera frekar dýrt fyrir þann sem lætur innramma, enda mikið vandaverk og efniskostnaður líka töluverður. Það fer þó væntanlega eftir því hvaða Sigurjón það er sem er rammaður inn. Ég býst við því að innrömmun Sigurjóns í Spaugstofunni kosti bara brot að því sem rukkað væri fyrir innrömmun Sigurjóns í Icesave. Eigi að síður þykir mér eins víst að mun meiri eftirspurn sé í samfélaginu eftir innrömmun hins síðarnefnda, þó ekki væri nema til að kvelja hann.

Annars er þetta óttalegt bull. Það er auðvitað ekki hægt að ramma heilan mann inn eins og hvert annað klessumálverk eða bróderí á striga. Karlmenn í heilum skrokkum eru einfaldlega allt of stórir og þungir - og þykkir - til að hægt sé að hengja þá upp á vegg í venjulegum myndaramma.

Eða það hélt ég þangað til fyrr í kvöld. Þá frétti ég um Innrömmun Kópavogs.