Aðalhlutverk eyrans er að skynja og greina hljóð. Annað mikilvægt hlutverk þess snýr að jafnvægisskyni okkar.

Innra eyrað er fyrir innan hljóðhimnuna og smábeinin þrjú; hamarinn, steðjann og ístaðið. Innra eyrað er kuðungslaga og fyllt vökva. Eftir göngum þess raða sér u.þ.b. 17000 mjög smáar bifhárafrumur. Þegar ístaðsbeinið hreyfist í sívala glugganum vegna hljóðbylgju þá kemst hreyfing á vökvann í innra eyranu og bifhárafrumurnar verða fyrir örvun Við það senda þær taugaboð um heyrnartaugina til heilans þar sem þau skynjast sem hljóð.

Skemmdir á bifhárunum valda heyrnarskerðingu en skemmd á heyrnartauginni algeru heyrnarleysi. Það er svo sem nógu slæmt en maður getur varla ímyndað sér hvílík þjáning það hlyti að vera ef jafnvægistaugin skemmdist. Svimi, ógleði og alger hreyfihömlun til æviloka. Sjóveikt fatlafól.

Þegar maður pælir í því, þá er það bara helvíti góður díll að eyðileggja heyrnartaugarnar en halda þó jafnvæginu.

Vonandi er ég nú ekki að verða jafn óþolandi jákvæður og fokkíng Pollýanna. Disneymyndin um hana var svo væmin að ég ældi (og eru þó jafnvægistaugarnar í fínu lagi). Ég var alltaf að vona að að einhver morðóður sadistaperri myndi ná henni og láta reyna almennilega á þessa bévítans jákvæðni. Helst bannað innan 18. Eða bara bannað yfirleitt. Ég vonaði lika alltaf að úlfurinn myndi loksins éta þessa óþolandi montrassagrísi. Já, og að Hjalti litli myndi bara drukkna í hlandþrónni næst þegar hann kæmi heim að grenja og væla í mömmu sinni yfir vandamálum við kúarekstur fyrir vandalausa. Hann hefði mín vegna mátt hnjóta um hræið af Árna í Hraunkoti þarna í þrónni.

Jæja, ég er líklega kominn út fyrir efnið. Svona getur þetta verið.