H.C. Andersens te
Ég heillaðist fyrst og fremst að því að Keemun te var notað í þessa blöndu. Ég er hrifnust af bragðsterkum svörtum tetegundum og þar er Keemun í hæsta gæðaflokki. Þetta er hágæða kínverskt te sem hefur unnið til virtra verðlauna.
Laufin eru þétt ofin, gróf og sterkilmandi. Lyktin er af appelsínu, sítrónu og öðrum sítrusávöxtum, en inn í það kemur sterk lykt af mangó. Satt að segja finnst mér það ilma nokkuð eins og Pickwick mangó te. Eftir fimm mínútna trekkingu við 100°C er vökvinn nokkuð ljós af Keemun að vera og ilmar nú nákvæmlega eins og Pickwick. Bragðið er sterkt án þess að vera beiskt, örlítið súrt en ansi gott. Almennt séð er mjög gott bragð af því og ég mæli með því við fólk sem vill drekka meira laust te, enda hræódýrt á 176 kr pokann og ágætt á bragðið. Hinsvegar hef ég fundið þetta sama bragð svo oft að ég mun líklega ekki kaupa þetta te aftur í bráð.

Teahouse Chai - Original India Spice
Hér er komið te frá einu af uppáhalds teframleiðendum mínum, Celestial Seasonings. Þetta er líklega eina pokateið sem ég voga mér að drekka þessa dagana, blöndurnar eru flestar snilldarlega góðar og 100% náttúrulegar. Annað sem ég dýrka við fyrirtækið er að þeir skreyta pakkningar sínar með gullfallegum málverkum og tilvitnunum sem fá mann til að hugsa meðan bragðað er á teinu. Þetta er í fyrsta skiptið sem ég smakka Chai frá þeim. Á veturna er Chai það besta sem ég fæ, sérstaklega þegar það er snjór og skítakuldi úti eins og núna, því kryddbragðið er vermandi og minnir á jólin. Chai er indverskt te sem inniheldur(oftast) svart te og ýmis krydd sem Indverjar nota mikið í eldamennsku. Þetta eru oftast kanill, negull, svartur pipar, engifer og kardimomma, en er mismunandi. Í þessari blöndu eru auk fyrrnefndra krydda múskat, kínverskur stjörnuanís og vanilla. Tepokinn ilmar helst af negul, kardimommu(namm, uppáhaldið mitt) og svörtum pipar. Þegar heitu vatninu er hellt yfir pokann losar vanillan sínar ilmolíur og vanilluilmurinn brýst fram, yndislegt. Vökvinn er skýjaður og dökksúkkulaðibrúnn. Ilmurinn er þykkur, sterkur og kryddaður en sætur og mjúkur vegna vanillunnar. Ég hef oft rekið mig á það að ýmsar Chai blöndur eru harðar og beiskar á bragðið af því að einhver hefur farið of langt með eitthvað krydd, en hér er það alls ekki tilfellið. Annað sem er sérstakt við lyktina er að mér finnst ég finna örlítinn reykelsiskeim af því, alls ekki slæmt. Við fyrsta sopann ríkir vanillan yfir öllu, með kryddin í eftirdragi. Eftirbragðið er sterkt eins og chili og situr eftir á tungunni, örugglega piparinn. Mjög bragðmikið og vel blandað. Það er örlítill súrleiki í því, mjög líklega engiferinn sem veldur því.
Ofsalega gott, langbest með hunangi. Ég drekk ekki mjólk út í te, en til að rúnna bragðið betur af gæti verið gott að bæta heitri mjólk út í.