Vitið þið hvað er kúl?
Að reykja kínverja - það er kúl!
Það eru bara al-hörðustu naglarnir sem reykja kínverja, Clint Eastwood og Nixon og svoleiðis menn.
Reyndar getur brennisteinsfnykurinn og sótið sem þessu fylgir verið kvimleitt. Sumir vilja meina að þetta geri manni erfitt fyrir með að ná hylli kvenþjóðarinnar en það er argasta kjaftæði. Allar gellur með gott sjálfsálit láta sig hafa það, við erum jú svalir naglar og því ýmislegt á sig leggjandi til að fá að sjást í kringum okkur, þær harka bara af sér og hugsa um eitthvað annað á meðan.
Svo hefur auðvitað verið einhver umræða um að kínverjareykingar séu heilsuspillandi og fari illa með tennurnar og fleira en alvöru naglar láta svoleiðis nag ekki hafa áhrif á sig. Við reykjum bara fleiri og stærri kínverja til að sýna öllum hver ræður.
Kínverjareykingamenn eiga samt undir högg að sækja, það er sótt að okkur úr öllum áttum í þessu þjóðfélagi, eftir 11. september var t.d. stranglega bannað að tendra kínverja í flugvélum og það er bara tímaspursmál hvenær atvinnubílstjórum verður bannað þetta líka. Fólk alltaf sínöldrandi, vilja að menn fari út til að tendra, segja að sótið og hávaðinn trufli sig, hver þarf á svoleiðis vinum að halda, andskotans eiginhagsmunaseggir, kæfandi allt sem gerir mann kúl.
Svo kemur helvítis nöldrið um óbeinar kínverjareykingar, vill nú kínverjalaus almúginn líka fara baða sig í frægðarljóma lífshættulegrar iðju kínverjareykingamanna? Reyndar eru menn að tala um að almúginn fái krabbamein en það er ekkert sannað! Hver hefur t.d. heyrt um að einhver hafi sprengt af sér kjálkann með óbeinum kínverja, fengið samfallið lunga eða varanlegan heilaskaða af annarra manna kínverjum, djöfuls wonnabís!
Svo er líka ekki það sama að reykja kínverja og reykja kínverja, menn eru auðvitað í missterkum kínverjum, flestir eru bara í beltakínverjum, aðrir reykja froska og sumir eru í alvöru hard-core kínverjareykingum, þeir eru að sjálfsögðu mestu naglarnir.
Keith varð t.d. frægur fyrir að vera fyrsti maðurinn til að reykja heila Örlygsbardagatertu einu sinni í partýi, hann þurfti auðvitað að fara í allsherjar yfirhalningu á eftir og það þurfti m.a. að fræsa tertuleifar úr hálsinum á honum en þetta var samt óneitanlega kúl. Kurt Cobain ætlaði einu sinni að toppa þetta með því að reykja handsprengju en það fór ekki eins vel - sumir vilja meina að Courtney Love hafi manað hann upp í það.
En allavega, látum ekki vaða yfir okkur, við getum gert það sem við viljum!
Höldum áfram að reykja okkar kínverja!