Nú er eldri dóttirin, hún Prímadonna, farin að læra í tónlistarskólanum. Þar sem hún er að stíga sín fyrstu skref í forskólanum er enn ekki komið að hljóðfæravali. Næstu tvö árin mun hún fá örlitla innsýn í hljómlistina, meðal annars með aðstoð blokkflautu.

Við upphaf skólaársins leitaði ég dyrum og dyngjum að gömlu flautunni sem ég brúkaði sjálf í sama tilgangi fyrir rúmlega tveim áratugum. Á heimilinu eru til nokkrar flautur, en misgóðar. Flauturnar sem Ívar dró í búið á sínum tíma reyndust ónothæfar með öllu.
Flauturnar mínar eru þrjár, þar af ein sem er alt-blokkflauta (þær eru svolítið stærri og ég byrjaði ekki að læra á hana fyrr en á 3. ári tónlistarskólans). Hinar tvær voru af réttri stærð, en eitthvað rámaði mig í að önnur væri ekki af réttri tegund.

Ég lagði höfuðið í bleyti og rifjaði upp þegar ég var 5-6 ára og fékk Aulos blokkflautu í jólagjöf. Hún reyndist ekki vera rétta tegundin þegar ég hóf nám í tónlistarskóla, svo foreldrar mínir keyptu Yamaha flautu samkvæmt ráðleggingum frá tónlistarskólanum.
Þessa vitneskju ákvað ég að nýta mér og vildi því senda frumburðinn með Yamaha gripinn í tónlistarskólann. En viti menn! Yamahaflautan fannst ekki! Vei ó vei, mig auma og allt það. Fimm mínútum fyrir brottför var Aulos-flautunni stungið í skólatösku barnsins með þeim orðum að kennarinn yrði að skera úr um hvort tegundin væri nothæf eður ei.

Dagarnir liðu og ekkert bólaði á skilaboðum frá kennaranum. Barnið búið að læra C og A og H.
Ég hugsaði með mér að kannski væri þetta allt í lagi, líklega gæti barnið lært allt um tónlist með hjálp Aulos. Þá heyrðist hljóð úr horni: „Allir hinir krakkarnir eru með jan... jahan... eitthvað flautu, bara ég er með Aulos“.
Ég leiddi þetta hjá mér fyrst um sinn þar til ég rifjaði upp ástæður þess að ég gat ekki notað Aulos flautuna forðum daga. Það hafði eitthvað að gera með fingrasetninguna, gripin eða hvaððanúheitir. Ég prófaði að flauta skalann á blokkflauturæfilinn, og viti menn. F var á vitlausum stað, og b líka.

Nú stend ég frammi fyrir því vandamáli að redda Yamaha flautu fyrir telpuna áður en hún á að læra F og b og allar hinar nóturnar sem eru öðruvísi á Aulos. Það þýðir annaðhvort að umturna íbúðinni í leit að hinni heilögu Yamaha eða þá arka út í næstu hljóðfærabúð og fjárfesta í slíkum grip.

Ef einhver veit hvar Yamahaflautan mín er að fela sig má hinn sami láta mig vita.