Enter skrifaði nýlega löngu tímabæra grein um það hversu hlunnfarið venjulegt fólk er þessi "jólin".

Jú Enter, ég var búin að taka eftir þessu, líkt og fleiri sem ég hef rætt við, en við leiddum vandamálið hjá okkur, svona í von um að það myndi gufa upp fyrir eitthvurt kraftaverk. En þar sem kraftaverkin eru löngu hætt að gerast (hafa varla látið sjá sig í tæp 2000 ár) þá er víst kominn tími til að draga höfuðið upp úr sandinum og horfast í augu við hryllinginn.

Staðreyndin er sú að í ár verða engin jól - nema kannski hjá nemendum og þingmönnum eins og Enter benti á. Þó efast ég um að téður hópur eigi mjög gleðileg jól, jah, nema kannski skólabörnin eigi foreldra sem eru alþingismenn eða kennarar. Að öðrum kosti er hætt við því að skólabörnin og alþingismennirnir (og kennararnir) verði mjög einmana þessa daga milli "jóla" og nýjárs.

Restin af þjóðinni, það er að segja við vinnumaurarnir, sér fram á jólalaus jól, sem birtast einungis í enn einni helginni sem er bara óvenju troðin af ýmsum skyldum. Stressið nær hámarki þegar "jólin" ber upp á venjubundna, vikulega frídaga.

Ímyndið ykkur týpíska kjarnafjölskyldu. Pabbinn, mamman og tvö börn. Ímyndið ykkur ósköp venjulega helgi, að því undanskildu að allir fá frí um hádegið á föstudeginum í stað þess að þurfa að vera í vinnu til kl. 17:00.
Frá því klukkan 12 á föstudeginum og fram á sunnudagskvöld er búist við að vísitölufjölskyldan sé alltaf hrein og strokin og í sínu fínasta pússi, enda í mörg jólaboðin að mæta. Vei þeim börnum sem sulla niður á jólafötin sín. Vei þeim mæðrum sem standa ekki vaktina við þvottavélina á nóttunni. Vei þeim feðrum sem passa ekki upp á að engin sósan brennist. Vei þeim sem gleyma að fara í kirkjugarðinn og vei þeim sem mæta ekki nógu snemma í kirkjuna til að fá góð sæti.

Vei þeim sem eru ekki brosandi einsog barbídúkka alla helgina, sama hvað á dynur. Vei þeim sem verður illt í tánum af of langri samvist við spariskóna sína. Vei þeim sem þykjast ekki upplifa helgina sem "Hátíð ljóss og friðar". Og vei þeim sem eru búnir að fatta að "jólin" 2005 verða lítið skárri.

Við getum svo sem alveg farið að hlakka til jólanna - jólanna 2006.