Ég tala nú aðeins af biturri reynslu því ég átti ansi erfitt með að taka gagnrýni fyrir upprisu mína. Tilmælin þóttu mér of hörð og líkt því að ætlunin væri að níða mig. Á meðan taldi ég að á ógrynni þráðanna væri ég einhvers staðar hæddur. Ég tel það stórlega til efs nú í dag. Mér finnst rétt að minna á reglur.

Í samfélagi fá ekki allir sínu framgengt. Ekki heldur í netsamfélagi sem Gestapó er. Því eru reglur settar og má færa smiðum þeirra miklar þakkir, því þó einfaldar séu tala þær fyrir háttsemi, kurteisi, málvörslu (raunar þykir mér málvörslureglan ómetanlegust af ómetanlegum reglunum) og gerir samfélaginu kleift að ganga sinn vanagang og sjálfin eiga auðveldara með samfélagslegar tilraunir í stofnun nýrra þráða vegna þess að reglurnar eru virtar. Ef tilraunin heppnast er samfélagið ríkara, ef ekki þá er það reynslunni ríkara.

Það sem Huxi á við í sem fæstum orðum (fyrirgefðu ef ég mistúlka þig) er að sómi sé ekki af því að tala niður til (þó húðlatir séu) samverkamanna þinna og stæra þig svo deginum seinna á því að af þínum sökum séu þeir reknir. Ég fékk sting í magann af því að lesa þetta. Sjálfur hef ég verið yfirmaður og þurft að tala fyrir brottrekstri. Það er sárt sama hversu mikið einstaklingur á það skilið. Því maður gæti verið að draga þann litla þrótt úr manneskjunni sem fyrir var.

Mín einlæga von er að þú deilir fremur sögum líkum þeim er ég las um daginn ellegar annarri reynslu sem býður upp á hugsun og húmor. Við komum hingað til að skemmta okkur og fræðast. Ég kem hingað til að slappa af, ekki að standa í deilum sem snúast um óverðuga hluti. Túlka mátti orð þín á þann veg að þú værir kynþáttahugull og stoðum fannst mér rennt undir þegar þú tiltekur svila/skyldmenni sem er af rómönskum ættum. Ef þessi lesning hjálapaði þá er það besta mál. Ef þú eyst úr skálum reiði þinnar þá bið ég þig að taka orð Huxa til endurskoðunar.