Eins og dæmin sanna er ég með eindæmum skapgóð og ekki margt sem fer í taugarnar á mér. Það er ekki margt sem fær mig til að hoppa um hamstola af bræði og reita hár mitt. En það er þó eitt sem ég hata meir en annað hér í heimi. Það eru PRENTARAR.

Ég er í erfiðu og krefjandi framhaldsnámi (veit ekki hversu krefjandi það er miðað við allan tímann sem ég eyði í vitleysu en það hljómar voða krefjandi, sko...). Til að geta lært þarf ég að geta prentað út helv... glósurnar. Til að geta það þarf ég að eiga prentara sem er nokkurn veginn heill á geðsmunum. Nú vil ég ekki ganga svo langt að segja að prentarinn minn sé verri en prentarar annarra eða verri en aðrir prentarar sem ég hef átt. Kannast reyndar ekki við neinn sem er reiðubúinn að lýsa yfir skefjalausri ást og aðdáun á prentaranum sínum...

Málið er nú samt að 77,36% af tímanum sem ég hef eytt í heimanám hefur farið í að tjónka við prentaraskömmina. Hann hefur húmor, það má hann eiga. Fyrst prentar hann eins og engill, eina eða tvær blaðsíður, svona til að halda mér heitri. Svo byrjar hann að teikna broskalla á síðurnar, sennilega bara til að ögra mér. Eftir það - svona svo að ég gefist ekki alveg upp - koma ein-tvær fullkomnar síður. Eftir það koma svo alls kyns torkennileg tákn. Þar á meðal krossar - sem ég get ekki túlkað öðru vísi en svo að prentaraskömmin vilji að ég krosssfesti mig.

Hef grun um að prentarinn sé andsetinn - eða getur einhver þýtt fyrir mig : #$/&))={[€€€€<a<a666°°+97@€©ª¨§^µÛ¯ÿ@©ª¨§ã···W ?? Þó að fögin mín séu bull og vitleysa þá er þetta samt ekki það sem stendur í glósunum! Kannski hann sé að tala tungum greyið? Sá annars þátt um daginn um ,,exorsista" (andsetnishrakningarmenn?) sem höfðu sært illa anda úr rúmum og brauðsristum. Veit einhver númerið hjá svoleiðis gaurum? Nei, sennilega ekki.

Tillaga mín er því þessi: Látum ekki auðvaldið kúga okkur! Verndum skógana og hættum að prenta! Út um gluggann með þessi andsetnu kvikindi!

Lifið heil.