Í gær varð ég fyrir þeirri óskemmtilegu reynslu að finna ekki uppáhaldskápuna mína.
Þetta er stutt, grá, aðskorin kápa með loðkraga. Þetta er frekar ódýr flík og á engan hátt merkileg utan þess að þetta er kápan MÍN og var auk þess gjöf svo að mér þykir vænt um hana... Eftir að hafa leitað dyrum og dyngjum í keisarahöllinni og öðrum stöðum þar sem ég ven komur mína komst ég að þeirri uggvænlegu en óumflýjanlegu niðurstöðu að téðri kápu hafi verið stolið. Brotist hafi verið inn í keisarabifreið númer eitt (en sú bifreið er þeim ágætu kostum búin að hægt er að brjótast inn án þess að hún beri þess nokkur ummerki) meðan keisaraynjan var að störfum og kápunni stolið. Það er eina skýringin; ekki er ég búin að vera að þvælast um full í kápunni og kápa er ekki flík sem maður glutrar sisona niður ef maður er allsgáður. Þetta kemur sér auðvitað mjög illa þar sem ég er með kvef og auk þess mjög blönk, svo að þessa dagana sé ég mig knúna til að verjast kuldanum með því að vefja mig inn í gömul dagblöð....
Þú sem tókst kápuna mína! Þú fantur og fól! Þú lortur, durtur og dusilmenni ! Já, þú, sem enga virðingu berð fyrir lífi, limum og eignum annarra. Þú svívirðilegi siðleysingi ! Veistu ekkert um karma eða jin og jang ? Þú hefur með þessu athæfi unnið þér inn eilífðarvítisvist. Þú munt brenna – í kápunni minni – í logum vítis til eilífðarnóns ! Þú hefur fyrirgert rétti þínum til eilífrar sæluvistar, að eilífu !
Heldurðu svo að þú getir einhvern tímann litið glaðan dag í kápunni minni ? O, seisei, nei – hvert sem þú ferð og hvar sem þú verður þar verð ég. Hvernig geturðu verið viss um, næst þegar þú ferð á kaffihús í kápunni MINNI, að fólkið sem brosir svo blítt á næsta borði sé ekki einmitt ég og hinar keisaralegu aftökusveitir? Og þá verður nú ekki mikið eftir af þér! Siðblindi hundingi. Þú sem ekki ert verður lífs á þessari jörð – þar sem kápan mín og ég lifðum hamingjusamar þangað til þú komst til sögunnar.
Viðurstyggilega siðblinda viðrini ! Drull**** til að skila henni ! Annars geturðu bara ímyndað þér afleiðingarnar, sálarlausa skrímslið þitt, þar sem þú liggur andvaka á nóttunni næstu fimmtíu árin og óttast reiði guðs og mína.
Fundarlaun í boði ! (mundar hlaðna haglabyssuna og bíður átekta) Þér verður ekki gert mein......
ps.er tæp á geði og illa haldin af fyrirtíðarspennu - þú vilt ekki messa í mér meir en orðið er...
Í þessu máli er enginn saklaus. nú eru aftökusveitirnar mannaðar og bara tímaspursmál hvenær þær taka til starfa!
Einmitt - það er réttarfarsstefna og meðvituð réttarpólítísk stefna keisaraveldisins - auk þess mjög svipað því sem kaninn gerir í útlandinu... ,,Ó, varstu bara fimm ára? Sorrí.."
Fara varlega í það að skjóta fyrst og spyrja svo, í það minnsta taka fólk fyrst úr kápnunum, svo þú gatir nú ekki þá einu réttu.
Ég svara von bráðar, þegar líf er komið i fingurnar. Afhverju áttir þú ekki vettlinga líka. Nei fyrirgefðu ég klæðist bara stutt ermabolum...