Sönn saga af sannri klisju.
Hann faðir minn er prófessor. Mjög klár maður, auðvitað, en hann er stundum viðutan eins og sonur hans. Hér er saga af því.
Fyrir eigi svo löngu síðan, sama kvöld og þessi pistill er skrifaður, var ég að hanga í lappanum mínum góða þegar þráðlaus sími hringdi. Þetta er pirrandi helvíti sem þarf oftast að gera langa og stranga leit að í hvert sinn sem hann hringir.
Jæja, þar sem ég er latur bastarður og Gestapófíkill þá datt mér ekki í hug að standa upp til að svara. Þessi sími foreldrahúsanna er hvort eð er aldrei notaður til að hafa samband við mig. Ég lét því móður minni eftir það leiða verk að leita apparatið uppi. Þetta tók hins vegar, eftir því sem mér sýndist í mínu annarlega Gestapófíknarástandi, óvenjulangan tíma í þetta skipti.
Að lokum hætti síminn að hringja án þess að móður minni tækist að hafa uppi á skrapatólinu. Von bráðar hringdi hann þó aftur, og sama ferlið endurtók sig, með sömu niðurstöðu.
Líður nú nokkur tími á meðan móðirin heldur áfram róti sínu. Í miðjum klíðum opnast útidyradyrnar og inn stígur faðir vor. Hann kemur færandi hendi - nánar til tekið er hann með símann góða í farteskinu. Hvaða þörf hann þóttist hafa fyrir því að nema þetta tiltekna heimilistæki á brott með sér veit sá er þetta ritar ekki, en hann hafði án efa sínar órannsakanlegu ástæður. Urðu að vonum miklir fagnaðarfundir með móður minni og símtækinu.
Lýkur hér með að þessu sinni sögu minni af prófessornum viðutan, föður mínum. Hann er æðislegur.
Láttu ekki svona Guðjón þótt ég taki óvart með mér í vinnuna eitt símtæki. Ekki er ég að skrifa pistla um þegar þú gleymdir að loka frystinum!
Skondin saga og ekki spillir fyrir að ég kannast nú við hann föður þinn...já, já það má nú segja...og það held ég nú...
Af hverju hringir síminn ef prófessorinn tók hann með sér ?
*Hlær að Þarfa fyrir að búa í foreldrahúsum*
Sko Steinríkur, þetta er einfalt. Það er svona hleðsluapparat sem hringir líka. Sem gerir það auðvitað ennþá erfiðara að finna helvítis símann.
*Ullar á Steinrík*
Uss, ég þarf greinilega að skrifa félagsrit um það þegar ég missti út úr mér pípuna.
Þetta minnir mig óneitanlega á það þegar ég bjó sem kvæntur maður og tveggja barna faðir í Eyjum og vann þar á vöktum í loðnubræðslu. Eina nótt var ég að fara á vakt og ákvað að henda ruslapokanum í leiðinni. Það kom heldur betur svipur á vinnufélagana og reyndar mig sjálfan líka þegar ég opnaði ruslpokann minn í kaffitímanum. Nestispokinn var hinsvegar í ruslatunnunni heima.
Já einmitt og þegar ég stóð í flutningum úr einni íbúð í aðra, nánast í sömu götu í vesturbænum. ég stóð í málningarvinnu í nýju íbúðinni og bjó í þeirri gömlu. Einn daginn ætlaði ég að fara að mála en fann hvergi lyklana af nýju íbúðinni. Leitaði og leitaði um allt í gömlu íbúðinni, úti í garði, inni á baði, alls staðar, uns ég þurfti að fá hjálp frá lásaopnara sem mætti á staðinn með loftbyssu og vildi nokkra þúsundkalla fyrir vikið enda helgidagur. Þegar málningardeginum var lokið ákvað ég að ná mér í kaldan vökva inni í ísskáp og viti menn, blöstu ekki lyklarnir við mér í neðstu hillunni, hrísluðust þar, ískaldir greyin. Hvernig í ósköpunum þeir lentu þar má almáttugur vita. Skemmtilegar svona sögur.
Þetta minnir mig á sögu sem ég heyrði einu sinni. Það var menntaskólastrákur sem var að fara í lokapróf í stærðfræði. Þegar hann var kominn í prófið og ætlaði að fara að leysa dæmin, þá fattaði hann sér til mikillar skelfingar að hann hafði gleymt reiknivélinni sinni. Hann fékk að hringja heim í móðir sína og bað hana að koma með reiknivélina í prófið. Móðir hans samþykkti það og mætti svo móð á staðinn og rétti honum fjarstýringuna af sjónvarpinu.
Ég þjáðist einmitt af þungun ekki langt fyrir löngu. Þá dagana þótti ekki óvenjulegt á mínu heimili að finna mjólk í diskaskápum og fjarstýringar í sokkaskúffum.