Árni M. Mathiesen, sjávarútvegsráðherra skýrði í dag frá ákvörðun ríkisstjórnarinnar þess efnis að mannvirki þau sem hýsa nú verslunarmiðstöð í Smáralind í Kópavogi, hýsi þess í stað stjörnusambandsstöð að tillögu Hins íslenska áhugamannafélags um ennýal og samtengingu gjörkosmískra plana.
Talsmaður félagsins, Geir Fannsker múrarameistari, sagðist í samtali við Baggalút vera himinlifandi, þótt ákvörðunin hafi ekki komið sér á óvart. „Við höfðum fyrir því nokkra vissu að svona myndi fara, enda er frá því skýrt nákvæmlega í spádómum dr. Helga, þar segir t.d.: „Bjargvætturinn kemur úr borg fuglanna og við tíunda tungl mun hann halda mikla ræðu.“ Þetta eru því ekki tíðindi í okkar huga, en fagnaðarefni öngvusíður.“
Samkvæmt heimildum Baggalúts mun hafa verið stuðst við teikningar dr. Sigvalda Ben heitins af Opinberri stjörnusambandsstöð við hönnun hússins, þar sem svokallaðir „kvistir“ og „framtrjóna“ gegna lykilhlutverki.
„Það er von mín að áhugamenn um astrófýsísk fræði og gjörkosmíska eigindaskömmtun muni eiga samastað og samnefnara í stöðinni og hún verði þeim skjól sem leita sannleikans af vettvangi nýalsins,“ sagði ráðherra, sem er annarrar gráðu regintengill í stúku astraleiginda í Reykjanesskjördæmi. Hvorki forsætisráðherra né aðrir aðilar ríkisstjórnarinnar könuðust við málið, en Geir Haarde sagðist ekki geta fylgst með öllum ákvörðunum samráðherra sinna frekar en þeir hans.
2 fyrir 1 til Bagdað
Eigum örfáa miða enn til Bagdað í kvöld. Öðruvísi skrúðgöngur. Frábær stemning. Hressandi sundferðir í Tígrisfljóti með skemmtilegu fólki. Pantið miða strax.
Lúdóferðir.
Það er sérlega ánægjulegt að taka við viðurkenningu fyrir hönd Baggalúts fyrir framúrskarandi rekstur samsteypunnar, og þar með hluti af þeim 2% fyrirtækja sem geta státað af slíkum árangri. Ljóst er að yfirgnæfandi hluti íslensks atvinnulífs er í tómu tjóni og órafjarri frá því að vera framúrskarandi á nokkurn hátt. Mættu þau taka Baggalút og önnur almennileg fyrirtæki sér til fyrirmyndar og hysja upp um sig rekstrarbrækurnar.
Það eru tíu lykilatriði atriði sem hafa komið Baggalúti á þennan eftirsóknarverða stað, sem rétt er að deila með áhugasömum:
Beri önnur fyrirtæki gæfu til að fylgja fordæmi okkar er ljóst að íslenskur fyrirtækjamarkaður yrði skjótt heilbrigðari og næði undraskjótt að skipa sér í fremstu röð í heiminum. En til þess er lítil von, meðan íslenskir stjórnendur eru upp til hópa óhæfar, ákvarðanafælnar gungur með allan sinn rekstur á bólakafi uppi í bakraufinni á sér.
Góðar stundir.
Baggalútur hefur, í samvinnu við erlenda öryggissérfærðinga, skipt út öllum lykilorðum í tölvukerfum samsteypunnar fyrir nýtt, samræmt lykilorð af öflugustu gerð. Í takt við stefnu félagsins um gagnsætt jafnrétti verður nýja lykilorðið samnýtt af öllu starfsfólki félagsins, sem m.a. mun tryggja að engin veikburða lykilorð verða lengur í umferð.
Nýja lykilorðið, 8t0c$bMp7t^HNax1
, uppfyllir ýtrustu kröfur um öryggi, bæði hvað varðar lengd og fjölbreytileika stafa.
Hólmgeir Hrafnkelsson hálfviti segir í aðsendri grein á fréttavef Baggalúts að hann hafi aldrei kallað Þórð Þrándsson hálfvita.
„Þetta eru mjög alvarlegar ásakanir á mig,“ segir Hólmgeir í greininni. „Mér er sama hvað þessi hálfviti heldur fram, ég hef aldrei kallað hann hálfvita.“
„Þessi hálfviti hefur ítrekað sýnt af sér hálfvitalega háttsemi og það er bara hreinn og klár hálfvitaskapur í honum,“ segir Hólmgeir að lokum.
Sérleg rannsóknarnefnd skipuð nokkrum hugprúðum mönnum á miðjum aldri freistar þess nú að fá hina dularfullu „apabólu“ fyrstir Þingeyinga, svo vitað sé.
Að sögn talsmanns hópsins ríkir mikil eftirvænting innan hans, en einnig nokkur kvíði, sem vonlegt er. Þeir hafi kynnt sér „bóluna“ nokkuð vel á undanförnum vikum, lesið sér til, sótt námskeið og telja sig býsna vel í stakk búna til að takast á við þennan óútreiknanlega vágest, sem hefur heillað marga að undanförnu. Gera þeir ráð fyrir að ljúka undirbúningi í kvöld og halda utan, áleiðis til Berlínar, snemma í fyrramálið.
Óskum við þeim félögum alls hins besta.
Riklingur
til sölu með sanngjörnu verði. A. v. á.
Hinn alræmdi fornleifafræðingur og mennþekkjari Hörður P. Einarz hefur uppgötvað sameiginlegan snertiflöt við ósamþykktan fornleifauppgröft við Holtagarða.
Er Hörður sannfærður um að snertiflöturinn sé býsna forn, eða jafnvel allt frá tímum verslunarveldisins Miklagarðs. Hefur hann fundið merki um káf, kám og jafnvel pot á fletinum.
Hörður vonast til að frekari rannsóknir á sameiginlega snertifletinum geti leitt í ljós ástæður þess að blómleg verslun leið undir lok á þessu svæði og hefur aldrei þrifist þar síðan.
Það er með feikimiklu stolti sem við tilkynnum að Baggalútur er í hópi Framúrskarandi fyrirtækja á Íslandi, annað árið í röð. Með því erum við ekki endilega að gera lítið úr þeim 98% fyrirtækja á Íslandi sem eru það EKKI, og eru þar af leiðandi í tómu rugli, rekstrarlega — en samt — við erum augljóslega betri en eiginlega allir.
Við þökkum árangurinn fyrst og fremst miklum árangri á menningar– og upplifunarsviði, en aukin áhætta sem fyrirtækið tók á köntrí– og aðventumarkaði á sínum tíma, þvert á spár sérfræðinga, hefur skilað sér í auknu eiginfjárhlutfalli og traustum rekstri. Þá var tekin umdeild ákvörðun innan stjórnar seint á síðasta áratug um að hætta alfarið rekstri kaffivélar, sem hefur skilað sér margfalt til baka.
Hið fornfræga myndmerki (e. lógó) Baggalúts hefur verið uppfært. Er það gert til að mæta betur kröfum samtímans um skjámiðlun, skölun, formlegt hagræði og breytta merkjaskynjun nútíma skjáneytenda, eins og segir í fréttatilkynningu.
Merki Baggalúts var upprunalega hannað af vestgotnesku listakonunni Gertrude Zeta–Zebra og standa angar þess fyrir gildi Baggalúts; traustgefni, samhygli, þrautsýni, metnúð og frumkvæðni. Þá stendur hringurinn fyrir kvenlægni og miðdepillinn fyrir mangó. Undirstrikið er svo villa í teikniforritinu Paint.
Eftir talsverða yfirlegu og hreinteikningu þar sem öll form, litir og útlínur myndmerkisins voru tekin til gagngerrar endurskoðunar, með tilliti til fagurfræðilegrar og tæknilegrar nálgunar, var ákveðið að færa merkið upp um þrjá svokallaða „pixla“ — til reynslu.
Eistu týndust
í hestaferð um Austurland milli jóla og nýárs.
Fundarlaun!
A.v.á.
Baggalútur sendir frá sér glænýtt aðventulag sem ber heitið „Afsakið þetta smáræði.” Þar bregður ljóðmælandi sér í hlutverk hins hógværa gestgjafa, sem afsakar lítilræðið sem er á boðstólnum. Lagið er áminning um að forðast asann og stressið í desember og setjast aðeins niður og slaka á. En um leið að fara nú ekki of geyst í áti, útbelgingi og ítroðningi.
Lag og texti er eftir Braga Valdimar Skúlason en ótal valinkunnir veislugestir komu að hljóð– og leikmynd lagsins. Guðm. Kristinn Jónsson stýrði upptökum í félagi við Sigurð Guðmundsson og Ágúst Bent leikstýrði krásum hlöðnu myndbandi, sem tekið var upp í hinum fornfræga skíðaskála í Hveradölum.
Í tilefni einmuna veðurblíðu sendir hljómsveitin Baggalútur frá sér nýtt lag, sem ber heitið Appelsínugul viðvörun.
Lagið er bæði uppblásið og háfleygt og er því tilvalin 17. júní blaðra til að sleppa í loftið á sjálfum þjóðhátíðardegi Íslendinga. Til lukku með lýðveldið.
Lagið er áhlýðanlegt á tónsprænunni Spotify. Því má dreifa sem víðast.
Allsherjar endurmörkun og ímyndarsköpun tónlistarmannsins Megasar er nú á lokametrunum. Að sögn yfirstílista verkefnisins hefur Megas verið endurskoðaður frá grunni, hann straumlínulagaður og útlit hans fært til nútímahorfs — án þess þó að hreyfa um of við sérkennum hans og alþýðlegu yfirbragði.
Samhliða þessu hafa textar Megasar verið einfaldaðir til muna til að ná til breiðari markhóps, auk þess sem þeir hafa verið leitarvélabestaðir og þýddir yfir á bæði hollensku og finnsku til að ná til stærra markaðssvæðis.
„Breytingin er ótrúleg. Hann hefur fengið alveg nýja litapalettu, nýtt og ferskt lógó, auk þess sem söngkonan Birgitta Haukdal mun ljá honum rödd sína. Sem er spennandi nýjung.“
Þá verða ný gildi Megasar kynnt, en þau eru ÁKEFÐ, EINURÐ og RÁÐDEILD.
Karlmaður á besta aldri, Nói Albínusarson, tók kassabíl bróðursonar síns traustataki snemma í morgun og ók af stað í honum, án þess að biðja um leyfi.
Því miður kunni Nói ekki á stjórntæki bílsins og mölbraut því sérsmíðaðan gírkassa bílsins, sem hafði einmitt unnið Ofvitann, nýsköpunarverðlaun ofurgáfaðra leikskólabarna.
Nói komst við illan leik úr bílnum, sem gereyðilagðist. Hann var þó hinn hressasti og vildi ólmur sýna blaðamanni hvernig hann sýður egg.
ÞÚ TRÚIR ALDREI HVAÐ GERÐIST NÆST!
Margir voru þegar farnir að spá rússneska lesbíudúettnum Tatu sigri í Eurovision þetta árið - þangað til Pólland kynnti til …
Ingiríður Ófelíudóttir mun ekki skila B.A. ritgerð sinni um arfgenga strípihneigð í samfélagi múmínálfa um næstu mánaðamót eins og áformað …
Baggalútur óskar landsmönnum öllum til sjávar og sveita gleðilegra jóla með þökk fyrir hið liðna. …
Einræktaði, erfðabreytti gölturinn Kenny er staddur hér á landi í boði IPA-Consulting group á Íslandi, sem sérhæfir sig í altækum …
Fregnir herma að tveir geltir hafi gert sér dælt við Viktoríu Beckham þegar hún var að skoða skóla fyrir syni …
Framkvæmdastjóri rafveitusviðs Orkubús Vestfjarða er ævareiður út í íbúa Mýrarhrepps en þeir tilkynntu um rafmagnsleysi nú fyrir stundu. „Helvítis fíflin. Þau …
„Mér finnst þetta bara í hæsta máta ómekklegt. Er þessu fræga fólki ekkert heilagt? Hvar endar eiginlega athyglissýkin?“ sagði bálillur …
Fyrsti fundur nýskipaðrar stjórnar Landssímans var haldinn í gærkvöldi. Erfiðlega hefur gengið að fá fólk til starfa í stjórninni, en …
Við húsleit í höfuðstöðvum Baugs á dögunum fannst leynileg pökkunarverksmiðja fyrir vörur sem seldar eru undir vörumerkinu BÓNUS. Svo virðist sem …