Lóa Hjálmtýsdóttir myndskreytti lagið af kostgæfni.

Hljómsveitin Baggalútur hefur sent frá sér nýtt dægurlag. Lagið heitir „Sorrí með mig“ og er ákaflega skemmtilegt og jafnframt áheyrilegt.

Lagið er nú komið á „Veraldarvefinn“, „Alnetið“ og jafnvel sjálft „Lýðnetið“ og er fáanlegt hjá eftirtöldum aðilum:

Hljóðskráargáttin Spotify

Myndskráargáttin YouTube

Við höfum aukinheldur, undir merkjum aukins gagnsæis, ákveðið að dreifa laginu á nótum. Þannig getur fólk betur áttað sig á verkinu, lært textann og jafnvel raulað laglínuna fyrir munni sér — áður en það hlýðir á það í fyrsta skipti.

Nótur má nálgast hér.

Auðveldlega mætti setja alla íbúa Miklubrautar í stokk.

Samtök áhugafólks um bílríkan lífsstíl hafa krafist þess að borgarstjóri verði settur í stokk til að refsa honum fyrir aðförina að einkabílnum í borginni.

Vilja þeir koma honum og öðrum andfélagslegum samgönguglæpamönnum (holuunnendum, hjólariðlum, stæðisfælum og strætófíklum) fyrir í þartilgerðum gapastokkum á fjölförnum stað — eins og til að mynda Stjörnutorgi — þar sem næg bílastæði eru og gott aðgengi að fæði til að kasta að stokkunum.

Það eru samtökin „elskhugar einkabílsins“ sem leggja þetta til. En þeir vilja geta notið ásta með bifreiðum sínum, óáreittir og í einrúmi á götum borgarinnar. Samtökin eru með höfuðstöðvar sínar á Seltjarnarnesi.

Elvis hyggst í staðinn verja deginum á Háspennu við Lækjartorg.

Hið óvænta, sprenghlægilega og árvissa aprílgabb Baggalúts felllur niður í ár, en með því vill Baggalútur styðja baráttuna gegn svokölluðum falsfréttum eða „fake news“.

Af þessum sökum verður tónlistarmaðurinn góðkunni Elvis Presley EKKI ber að ofan í Bláa lóninu í dag að syngja fallegu lögin sín og gefa iPhone síma eins og undanfarin ár.

Þeim sem vilja engu að síður láta gabbast er bent á íslenskar fjármálastofnanir, kaupmenn og hin ýmsu leigufélög.

Hauck og Aufhäuser á sínum velmektarárum.

Rannsóknarnefnd Alþingis hefur sannreynt að hinir dularfullu Hauck & Aufhäuser komu aldrei að kaupum Búnaðarbankans ólíkt því sem haldið hefur verið fram frá upphafi.

Hið sanna er að þeir Helmut Hauck og Dolph Aufhäuser mynda í raun þýskan tölvurafpoppdúett sem Ólafur Ólafsson, peningamaður, virðist hafa haft mikið dálæti á.

Að sögn Hauck, sem starfar nú sem barnatannlæknir í Dusseldorf, hafði Ólafur samband við þá gegnum pennavinadálk tímaritsins Bravo og vildi endilega fá þá til að spila í afmælinu sínu.

„Við kvittuðum á einhverja pappíra og æfðum upp prógramm með íslenskum dægurlögum, en heyrðum svo aldrei aftur í herr Olafsson,“ segir Hauck sem kveðst vera í litlu sambandi við sinn gamla félaga, Aufhäuser, sem starfar nú sem barþjónn á hollensku skemmtiferðaskipi.

Framkvæmdastjóri SFS þykir einnig eiga góða möguleika á að landa hlutverki í myndinni.

Útgerðarfélagið geðþekka, HB Grandi, mun leika skúrkinn í næstu kvikmynd um siðblinda alkóhólistann og flagarann morðóða James Bond.

Í kvikmyndinni á Bond í höggi við dularfullan aðalsmann sem virðist sjúga blóð úr íbúum í afskekktu sjávarþorpi. Vondi greifinn er með pattaralegan bæjarstjórann í vasanum og enginn þorir að rísa gegn honum af ótta um líf sitt og fjárhagslega afkomu samfélagsins.

Bond fer að gruna kauða um græsku þegar hann uppgötvar að vodkamartíníið á þorpskránni er svívirðilega dýrt og sterlingspundið grunsamlega óhagstætt gagnvart gjaldmiðli staðarins. Auk þess sem hvergi er hægt að fá ætt sushi í bænum, þrátt fyrir fengsæl fiskimið og sæmilega háa meðalgreind íbúanna.

Vildu aðstandendur myndarinnar fá sem ógeðfelldastan leikara í hlutverkið sem nyti engrar samúðar áhorfenda. Hafði HB Grandi betur en m.a. sjálft Alienskrímslið, flenniapinn King Kong og Magnús Scheving.

Þjónninn hafði áður fengið áminningu fyrir að spyrja gest „hvernig smakkaðist?“

Uppi varð fótur og fit á veitingastaðnum Las Vegans í miðborginni í gærkvöldi þegar þjóni varð á að segja „gjörðu svo vel“ við einn matargestanna.

Varð sá hinn sami að vonum sármóðgaður, enda í óaðfinnanlegu líkamlegu ásigkomulagi og mátti ætla af orðum þjónsins að hann óskaði honum þess að bæta á sig óþarfa líkamsþyngd — sem næmi allt að þremur kálblöðum og einhverju torkennilegu lárperujukki í snefilmagni. Auk vatnsglass.

Var þjóninum tafarlaust vikið frá störfum og honum gert að fara í sjö mánaða þagnarbindindi auk þ.ess að sækja námskeið um líkamsvirðingu, meðhöndlun grænmetisætna og tilfinningagreind.

Svona var umhorfs við höfuðstöðvar Arion banka um kvöldmatarleytið.

Dótturfélag Kaupþings, hefur selt tæplega 583 milljónir hluta í Arion banka, eða um 29,18% hlutafjár í bankanum, fyrir ríflega 48,8 milljarða króna. Kaupendurnir eru fjögur öldungsskrísmsli, oft kennd við Cthulhu.

Þetta eru þau Kurpannga, Lexur'iga-serr'roth, Raandaii-B'nk og S'tya-Yg'Nalle, en þau hafa öll tengsl við erlenda vogunarsjóði — auk þess að vinna leynt og ljóst að heimsyfirráðum gegnum undirmeðvitund dauðlegra borgara.

Að sögn S'tya-Yg'Nalle, sem er yfirnáttúruleg vera gerð af kulda og hrolli, eru kaupin hugsuð sem langtímafjárfesting, enda hafi þau afar þolinmótt fjármagn til umráða.

Skrímslin segjast einróma hlakka til að eyða meiri tíma á Íslandi. Skoða helstu ferðamannagildrur og auðvitað heilsa upp á lilu frændur sína hjá Gamma.

Bakkinn er að mestu samansettur úr afgöngum frá fámennu þorrablóti Ríkisráðsins 2008.

Donald John Trump, fígúra og verðandi valdamesti maður heims, fær í dag góða gjöf frá íslensku þjóðinni í tilefni af embættistöku sinni.

„Okkur þótti þetta bara vel við hæfi að færa honum forláta íslenskan þorrabakka með öllu tilheyrandi,“ sagði skemmtanastjóri utanríkisráðuneytisins aðspurður um þessa sérstöku gjöf.

„Þetta er þjóðlegt, geymist vel og ætti að vekja verðskuldaða athygli, ef þetta kemst í gegnum öryggisgæsluna. Svo er þetta líka einhvern veginn lýsandi fyrir Trump sem einstakling. Hann er einmitt svona gamaldags súr pungur, nett slepjulegur — og alls ekki allra.“

Fólk á eftir að flykkjast hingað til lands til að sjá vöfflu með engu á 2.000 krónur.

Aðilar í ferðaþjónustu telja mikil sóknarfæri í að markaðssetja íslenska ofurverðlagningu fyrir erlenda ferðamenn.

„Ég meina, hver vill ekki koma og skoða heimsins dýrustu vöfflu, yfirverðlögðustu pylsu allra tíma, eða sjá með eigin augum minnsta 1.600 kr. kaffibolla veraldar?“ segir talsmaður „Aðildarsamtaka ferðaaðila“ með sleftaum í öðru munnviki og gróðaglampa í auga.

„Það eru ótrúleg tækifæri í því að fá fólk hingað til að kynnast sturluðum prísum og ósanngjarnri verðlagningu af eigin raun. Þetta er eitthvað sem fólk þekkir ekki af sínum heimaslóðum og þykir framandi og spennandi. Ég meina, fyrst við gátum platað þessi fífl til að fíla íslenska veðrið — þá hljótum við að geta selt þeim íslenska verðið.“

Duglegir strákar.

Baggalútur hefur undir höndum glóðvolgan stjórnarsáttmála nýrrar ríkisstjórnar.

Sáttmálann gerðu þeir saman, Bjarni Benediktsson, Óttarr Proppé og Benedikt Jóhannesson — alveg sjálfir í morgun.

Fengu þeir félagarnir mikið hrós fyrir sáttmálann frá samflokksfólki sínu, sem var sammála um að þeim hefði farið mikið fram í vetur.

Hér má sjá sáttmálann í allri sinni dýrð!

Bjarni er svokallaður hægrimaður. Þeir eru mest fyrir hægri stjórnir.

Íslenskir hægrimenn hafa ákveðið að mynda svokallaða hægristjórn.

Hefur þetta komið ýmsum töluvert í opna skjöldu, einkum fólki á vinstri væng stjórnmálanna. Telja margir sig illa svikna, sérí lagi þeir sem ekki kusu flokkana þrjá sem nú geta myndað stjórn.

Mest eru þó vonbrigði þeirra sem kusu einn þessara flokka, en hefðu kannski mögulega kosið eitthvað allt annað, hefðu þeir kynnt sér hvað þeir voru að kjósa yfir höfuð.

Aðspurður um það hvers vegna í ósköpunum ætlunin sé að mynda hægri stjórn á þessum tímapunkti sagði væntanlegur forsætisráðherra undrandi: „Ööö … beisikklí af því að við getum það.“