Einkaleyfanefnd Bandaríkjanna hefur hafnað í úrskurði sínum umsókn leikarans geðþekka, Johns Travolta um einkaleyfi á nýrri uppfinningu. Uppfinningin sem Travolta kallar 'The Scientician', sem útleggst 'Vísindarinn' á íslensku hefur verið í þróun hjá honum nokkur undanfarin ár. Svo virðist sem aðalástæða höfnunarinnar sé algjört gagnsleysi uppfinningarinnar en nefndin gat alls ekki fundið út hvað hún á að gera. "Þetta er mjög kúl tæki, alls konar leiðslur og svoleiðis. En því miður gerir það ekkert nema líta út fyrir að vera mjög vísindalegt." Travolta er að sögn mjög vonsvikinn en ætlar ekki að láta deigan síga heldur hella sér beint í þróun á hinum svokallaða 'Galactic Experimentor', á íslensku 'Alheims Tilraunaranum'.
Stúlka
sem er vön þyngdarleysi, kann forn-grísku og zwahili, getur fengið góða atvinnu. Umsókn merkt 'atvinna' sendist ritstjórn innan viku.
Það er sérlega ánægjulegt að taka við viðurkenningu fyrir hönd Baggalúts fyrir framúrskarandi rekstur samsteypunnar, og þar með hluti af þeim 2% fyrirtækja sem geta státað af slíkum árangri. Ljóst er að yfirgnæfandi hluti íslensks atvinnulífs er í tómu tjóni og órafjarri frá því að vera framúrskarandi á nokkurn hátt. Mættu þau taka Baggalút og önnur almennileg fyrirtæki sér til fyrirmyndar og hysja upp um sig rekstrarbrækurnar.
Það eru tíu lykilatriði atriði sem hafa komið Baggalúti á þennan eftirsóknarverða stað, sem rétt er að deila með áhugasömum:
- Ekkert starfsfólk
- Engin viðvera
- Ekkert húsnæði
- Engin þjónusta
- Engin gildi
- Engin frí
- Engin áhætta
- Ekkert internetsamband
- Enginn samningsvilji
- Engin kaffivél
Beri önnur fyrirtæki gæfu til að fylgja fordæmi okkar er ljóst að íslenskur fyrirtækjamarkaður yrði skjótt heilbrigðari og næði undraskjótt að skipa sér í fremstu röð í heiminum. En til þess er lítil von, meðan íslenskir stjórnendur eru upp til hópa óhæfar, ákvarðanafælnar gungur með allan sinn rekstur á bólakafi uppi í bakraufinni á sér.
Góðar stundir.