Magnús Elinóruson, rafvirki, hefur skorið upp herör gegn einelti. Hann ferðast nú um landið og heldur fyrirlestra fyrir grunnskólabörn um þessa alvarlegu tegund ofbeldis.
"..ég hef dálitla reynslu af þessu sjálfur," sagði Magnús, eða Maggi pissudúkka eins og hann er gjarnan kallaður. "..ég leið fyrir það að vera dálítið innskeifur þegar ég var yngri og ég vil miðla af reynslu minni."
Magnús segist hafa fengið ágæt viðbrögð við þessu þarfa framtaki "..krakkarnir eru í það minnsta hættir að troða mér í sorpgámana núna. Og ég er búinn að finna gleraugun mín aftur," sagði þessi glaðbeitti hugsjónamaður að lokum.
Fjölskyldutilboð
Eigum fyrirliggjandi ósundraðar fjölskyldur í þokkalegum efnum á góðu verði. A.v.á.
Það er sérlega ánægjulegt að taka við viðurkenningu fyrir hönd Baggalúts fyrir framúrskarandi rekstur samsteypunnar, og þar með hluti af þeim 2% fyrirtækja sem geta státað af slíkum árangri. Ljóst er að yfirgnæfandi hluti íslensks atvinnulífs er í tómu tjóni og órafjarri frá því að vera framúrskarandi á nokkurn hátt. Mættu þau taka Baggalút og önnur almennileg fyrirtæki sér til fyrirmyndar og hysja upp um sig rekstrarbrækurnar.
Það eru tíu lykilatriði atriði sem hafa komið Baggalúti á þennan eftirsóknarverða stað, sem rétt er að deila með áhugasömum:
- Ekkert starfsfólk
- Engin viðvera
- Ekkert húsnæði
- Engin þjónusta
- Engin gildi
- Engin frí
- Engin áhætta
- Ekkert internetsamband
- Enginn samningsvilji
- Engin kaffivél
Beri önnur fyrirtæki gæfu til að fylgja fordæmi okkar er ljóst að íslenskur fyrirtækjamarkaður yrði skjótt heilbrigðari og næði undraskjótt að skipa sér í fremstu röð í heiminum. En til þess er lítil von, meðan íslenskir stjórnendur eru upp til hópa óhæfar, ákvarðanafælnar gungur með allan sinn rekstur á bólakafi uppi í bakraufinni á sér.
Góðar stundir.