Vegna fjölda áskorana verður skemmtilegi sólmyrkvinn frá 20. mars endurtekinn í dag, 1. apríl, kl. 17:00 að staðartíma.
Er þetta kærkomið tækifæri fyrir alla þá sem misstu af myrkvanum að sjá þetta stórfenglega sjónarspil, sem allir voru að tala um. Og fyrir alla hina til að sjá hann nú með berum augum.
Sérstök sólmyrkvahátíð verður haldin á þaki stjórnarráðsins kl. 17 í dag, en þar verður allt krökkt af berbrjósta þingmönnum og gefins snjallpáskaeggjum frá Apple, Bítlarnir taka lagið auk þess sem heróínvagninn mætir á svæðið og býður upp á léttar veitingar.
Myrkvinn er í boði Texasborgara.
Tapað fundið
Kartafla í laginu eins og Megas á hvolfi í hjólbörum týndist á miðju Klambratúni. Fundarlaun.
Það er sérlega ánægjulegt að taka við viðurkenningu fyrir hönd Baggalúts fyrir framúrskarandi rekstur samsteypunnar, og þar með hluti af þeim 2% fyrirtækja sem geta státað af slíkum árangri. Ljóst er að yfirgnæfandi hluti íslensks atvinnulífs er í tómu tjóni og órafjarri frá því að vera framúrskarandi á nokkurn hátt. Mættu þau taka Baggalút og önnur almennileg fyrirtæki sér til fyrirmyndar og hysja upp um sig rekstrarbrækurnar.
Það eru tíu lykilatriði atriði sem hafa komið Baggalúti á þennan eftirsóknarverða stað, sem rétt er að deila með áhugasömum:
- Ekkert starfsfólk
- Engin viðvera
- Ekkert húsnæði
- Engin þjónusta
- Engin gildi
- Engin frí
- Engin áhætta
- Ekkert internetsamband
- Enginn samningsvilji
- Engin kaffivél
Beri önnur fyrirtæki gæfu til að fylgja fordæmi okkar er ljóst að íslenskur fyrirtækjamarkaður yrði skjótt heilbrigðari og næði undraskjótt að skipa sér í fremstu röð í heiminum. En til þess er lítil von, meðan íslenskir stjórnendur eru upp til hópa óhæfar, ákvarðanafælnar gungur með allan sinn rekstur á bólakafi uppi í bakraufinni á sér.
Góðar stundir.