Samkvæmt öruggum heimildum Baggalúts er sjálf Fjallkonan að íhuga að leiða lista framsóknarflokksins í borginni.
Fjallkonan er sem kunnugt er eindreginn stuðningsmaður flokksins og hefur komið að stefnumótun hans um áratuga skeið. Hún er nú búsett í Efra-Breiðholti ásamt unnustu sinni og 18 köttum og er því kjörgeng í borginni.
Standa vonir til þess að Fjallkonan fái að vera í friði fyrir svæsinni netumfjöllun, í það minnsta fram að kosningum. Góð sátt er meðal þjóðarinnar um hana, auk þess sem hún þykir bæði orðheppin og smart í tauinu (m.v. framsóknarkonu). Þá hefur hún ekki sagt neitt ljótt á svokölluðum herrakvöldum, þrátt fyrir að hafa verið tíður gestur á slíkum kvöldum gegnum tíðina, með hið vinsæla freyðibaðsdansatriði sitt.
Fallöxi
óska eftir að kaupa vel með farna fallöxi, til heimilis- og einkanota eingöngu. A.v.á.
Það er sérlega ánægjulegt að taka við viðurkenningu fyrir hönd Baggalúts fyrir framúrskarandi rekstur samsteypunnar, og þar með hluti af þeim 2% fyrirtækja sem geta státað af slíkum árangri. Ljóst er að yfirgnæfandi hluti íslensks atvinnulífs er í tómu tjóni og órafjarri frá því að vera framúrskarandi á nokkurn hátt. Mættu þau taka Baggalút og önnur almennileg fyrirtæki sér til fyrirmyndar og hysja upp um sig rekstrarbrækurnar.
Það eru tíu lykilatriði atriði sem hafa komið Baggalúti á þennan eftirsóknarverða stað, sem rétt er að deila með áhugasömum:
- Ekkert starfsfólk
- Engin viðvera
- Ekkert húsnæði
- Engin þjónusta
- Engin gildi
- Engin frí
- Engin áhætta
- Ekkert internetsamband
- Enginn samningsvilji
- Engin kaffivél
Beri önnur fyrirtæki gæfu til að fylgja fordæmi okkar er ljóst að íslenskur fyrirtækjamarkaður yrði skjótt heilbrigðari og næði undraskjótt að skipa sér í fremstu röð í heiminum. En til þess er lítil von, meðan íslenskir stjórnendur eru upp til hópa óhæfar, ákvarðanafælnar gungur með allan sinn rekstur á bólakafi uppi í bakraufinni á sér.
Góðar stundir.