Sá fáheyrði atburður átti sér stað á Akureyri snemma í morgun að Atli Flygering, afgreiðslumaður, náði að snoða vin sinn Hilmar Hansen, nuddara, með hugarorkunni einni saman.
"..þetta er í raun ólýsanlegt," sagði Hilmar, sem enn var í hálfgerðu losti. "..Atli stóð á bak við mig og allt í einu fann ég hvernig hárið þeyttist af höfðinu á mér. Ég hef séð hann beygja skeiðar og hjólkoppa og svoleiðis en þetta var alveg nýtt fyrir mér!"
"..þetta er bara hæfileiki," sagði Atli hógvær. "..sem ég hef náð að þróa á þennan hátt. Ég reyndi fyrst að raka mýs, þá hunda og loks sjálfan mig. Ég þorði ekki að reyna þetta á Himma fyrr en ég væri svona 70% viss um að þetta væri skaðlaust."
Akureyrabær íhugar nú sterklega að selja Atla í fjölleikahús til að styrkja fjárhagsstöðu bæjarins.
Keðjusagarmorðingjar
Nú þarf enginn að láta hátt eldsneytisverð trufla tómstundirnar. Vorum að fá nýja sendingu af rafknúnum keðjusögum í ýmsum stærðum og litum. -Byggsmiðjan
Það er sérlega ánægjulegt að taka við viðurkenningu fyrir hönd Baggalúts fyrir framúrskarandi rekstur samsteypunnar, og þar með hluti af þeim 2% fyrirtækja sem geta státað af slíkum árangri. Ljóst er að yfirgnæfandi hluti íslensks atvinnulífs er í tómu tjóni og órafjarri frá því að vera framúrskarandi á nokkurn hátt. Mættu þau taka Baggalút og önnur almennileg fyrirtæki sér til fyrirmyndar og hysja upp um sig rekstrarbrækurnar.
Það eru tíu lykilatriði atriði sem hafa komið Baggalúti á þennan eftirsóknarverða stað, sem rétt er að deila með áhugasömum:
- Ekkert starfsfólk
- Engin viðvera
- Ekkert húsnæði
- Engin þjónusta
- Engin gildi
- Engin frí
- Engin áhætta
- Ekkert internetsamband
- Enginn samningsvilji
- Engin kaffivél
Beri önnur fyrirtæki gæfu til að fylgja fordæmi okkar er ljóst að íslenskur fyrirtækjamarkaður yrði skjótt heilbrigðari og næði undraskjótt að skipa sér í fremstu röð í heiminum. En til þess er lítil von, meðan íslenskir stjórnendur eru upp til hópa óhæfar, ákvarðanafælnar gungur með allan sinn rekstur á bólakafi uppi í bakraufinni á sér.
Góðar stundir.