Forseti Íslands, Herra Ólafur Ragnar Grímsson og frú Vígdís Finnbogadóttir fyrrverandi forseti tilkynntu íslensku þjóðinni í morgun um óvænta trúlofun sína. Forsetinn bað þjóðina um tilfinningalegt svigrúm við þetta tækifæri. Að sögn Vigdísar hittust þau skötuhjúin á ónefndu baðhúsi í vesturbænum. "Þetta var ást við fyrstu sýn. Eftir að Ólafur lét laga á sér nefið og taka augnpokana var þetta aldrei spurning", sagði Vigdís sem var óvenju kurteis og vel til fara í morgun.
Til leigu
Tilraunastofa í efra Breiðholti, hentar vel fyrir tilraunir með smærri kjarnavopn. Afgreiðsla vísar á.
Það er sérlega ánægjulegt að taka við viðurkenningu fyrir hönd Baggalúts fyrir framúrskarandi rekstur samsteypunnar, og þar með hluti af þeim 2% fyrirtækja sem geta státað af slíkum árangri. Ljóst er að yfirgnæfandi hluti íslensks atvinnulífs er í tómu tjóni og órafjarri frá því að vera framúrskarandi á nokkurn hátt. Mættu þau taka Baggalút og önnur almennileg fyrirtæki sér til fyrirmyndar og hysja upp um sig rekstrarbrækurnar.
Það eru tíu lykilatriði atriði sem hafa komið Baggalúti á þennan eftirsóknarverða stað, sem rétt er að deila með áhugasömum:
- Ekkert starfsfólk
- Engin viðvera
- Ekkert húsnæði
- Engin þjónusta
- Engin gildi
- Engin frí
- Engin áhætta
- Ekkert internetsamband
- Enginn samningsvilji
- Engin kaffivél
Beri önnur fyrirtæki gæfu til að fylgja fordæmi okkar er ljóst að íslenskur fyrirtækjamarkaður yrði skjótt heilbrigðari og næði undraskjótt að skipa sér í fremstu röð í heiminum. En til þess er lítil von, meðan íslenskir stjórnendur eru upp til hópa óhæfar, ákvarðanafælnar gungur með allan sinn rekstur á bólakafi uppi í bakraufinni á sér.
Góðar stundir.