Drullusokkur á miðjum aldri, sem er bæði samviskulaus og siðblindur komst enn eina ferðina í fréttirnar í dag.
Maðurinn er margdæmdur fíkniefnasali, fjárglæframaður og hrotti og bíður dóms fyrir skipulagða árás á hóp aldraðra öryrkja í messu fyrr á árinu.
Hann keypti sér hins vegar jakkaföt um nýliðna helgi og komst fyrir vikið í alla helstu fjölmiðla, enda eru þau óneitanlega einstaklega klæðileg og sérlega mjúk viðkomu.
Vélmenni
128K HOME-SABER 2000 vélmenni með uppvasks- og ryksugunaruppfærslu fæst keypt gegn sanngjörnu verði eða í skiptum fyrir asíska unaðsdúkku. A.v.á.
Það er sérlega ánægjulegt að taka við viðurkenningu fyrir hönd Baggalúts fyrir framúrskarandi rekstur samsteypunnar, og þar með hluti af þeim 2% fyrirtækja sem geta státað af slíkum árangri. Ljóst er að yfirgnæfandi hluti íslensks atvinnulífs er í tómu tjóni og órafjarri frá því að vera framúrskarandi á nokkurn hátt. Mættu þau taka Baggalút og önnur almennileg fyrirtæki sér til fyrirmyndar og hysja upp um sig rekstrarbrækurnar.
Það eru tíu lykilatriði atriði sem hafa komið Baggalúti á þennan eftirsóknarverða stað, sem rétt er að deila með áhugasömum:
- Ekkert starfsfólk
- Engin viðvera
- Ekkert húsnæði
- Engin þjónusta
- Engin gildi
- Engin frí
- Engin áhætta
- Ekkert internetsamband
- Enginn samningsvilji
- Engin kaffivél
Beri önnur fyrirtæki gæfu til að fylgja fordæmi okkar er ljóst að íslenskur fyrirtækjamarkaður yrði skjótt heilbrigðari og næði undraskjótt að skipa sér í fremstu röð í heiminum. En til þess er lítil von, meðan íslenskir stjórnendur eru upp til hópa óhæfar, ákvarðanafælnar gungur með allan sinn rekstur á bólakafi uppi í bakraufinni á sér.
Góðar stundir.