Hvergi hefur komið fram í fjölmiðlum af hvaða kyni nýr biskup yfir Íslandi er.
Er þetta algerlega óþolandi ástand, en það hefur verið venja að tilkynna skýrt og greinilega kyn allra íslenskra biskupa um leið og þeir eru kjörnir til starfans – þannig að enginn vafi leiki á kynferði þeirra, ef eitthvað er.
Baggalútur hefur þegar sent biskupsstofu beiðni um kynvottun nýs biskups og mun birta niðurstöðuna um leið og hún berst. Óvissan er óbærileg.
Viðarsúla afhjúpuð í Friðey
En þér er heldur ekki boðið þangað.
Það er sérlega ánægjulegt að taka við viðurkenningu fyrir hönd Baggalúts fyrir framúrskarandi rekstur samsteypunnar, og þar með hluti af þeim 2% fyrirtækja sem geta státað af slíkum árangri. Ljóst er að yfirgnæfandi hluti íslensks atvinnulífs er í tómu tjóni og órafjarri frá því að vera framúrskarandi á nokkurn hátt. Mættu þau taka Baggalút og önnur almennileg fyrirtæki sér til fyrirmyndar og hysja upp um sig rekstrarbrækurnar.
Það eru tíu lykilatriði atriði sem hafa komið Baggalúti á þennan eftirsóknarverða stað, sem rétt er að deila með áhugasömum:
- Ekkert starfsfólk
- Engin viðvera
- Ekkert húsnæði
- Engin þjónusta
- Engin gildi
- Engin frí
- Engin áhætta
- Ekkert internetsamband
- Enginn samningsvilji
- Engin kaffivél
Beri önnur fyrirtæki gæfu til að fylgja fordæmi okkar er ljóst að íslenskur fyrirtækjamarkaður yrði skjótt heilbrigðari og næði undraskjótt að skipa sér í fremstu röð í heiminum. En til þess er lítil von, meðan íslenskir stjórnendur eru upp til hópa óhæfar, ákvarðanafælnar gungur með allan sinn rekstur á bólakafi uppi í bakraufinni á sér.
Góðar stundir.