Íslenskur prestur, séra Guðfús Víglundsson, er kominn í úrslit í hinum vinsæla raunveruleikaþætti So you think you can preach? sem sýndur er víða um heim. Þar etur hann kappi við efnilega prédikara víðsvegar að og hefur hingað til staðið sig með miklum sóma.
Prédikanir Guðfúss hafa þótt afar fjölbreyttar en hann hefur meðal annars fjallað um kærleikann, syndina, fyrirgefninguna, iðrunina, Biblíuna, umburðarlyndið og fleiri sígild kristileg umræðuefni með ákveðnum greini.
Áheyrnarpróf fyrir íslenska útgáfu af þættinum munu fara fram síðar í haust, ef enn finnast nægilega margir meðlimir í Þjóðkirkjunni.
Freðýsa
Sigin og feit freðýsa til sölu. Á sama stað einnig golþorskur. Fiskbúð Fiskmundar.
Það er sérlega ánægjulegt að taka við viðurkenningu fyrir hönd Baggalúts fyrir framúrskarandi rekstur samsteypunnar, og þar með hluti af þeim 2% fyrirtækja sem geta státað af slíkum árangri. Ljóst er að yfirgnæfandi hluti íslensks atvinnulífs er í tómu tjóni og órafjarri frá því að vera framúrskarandi á nokkurn hátt. Mættu þau taka Baggalút og önnur almennileg fyrirtæki sér til fyrirmyndar og hysja upp um sig rekstrarbrækurnar.
Það eru tíu lykilatriði atriði sem hafa komið Baggalúti á þennan eftirsóknarverða stað, sem rétt er að deila með áhugasömum:
- Ekkert starfsfólk
- Engin viðvera
- Ekkert húsnæði
- Engin þjónusta
- Engin gildi
- Engin frí
- Engin áhætta
- Ekkert internetsamband
- Enginn samningsvilji
- Engin kaffivél
Beri önnur fyrirtæki gæfu til að fylgja fordæmi okkar er ljóst að íslenskur fyrirtækjamarkaður yrði skjótt heilbrigðari og næði undraskjótt að skipa sér í fremstu röð í heiminum. En til þess er lítil von, meðan íslenskir stjórnendur eru upp til hópa óhæfar, ákvarðanafælnar gungur með allan sinn rekstur á bólakafi uppi í bakraufinni á sér.
Góðar stundir.