Ungur súðvískur farandriddari hyggst gera áhlaup á íslensku bankana í dag.
Riddarinn, sem kallar sig Sinnep lávarð, kveðst vera kominn með upp í kok af framferði bankana, tillitsleysi þeirra við almenning og gegndarlausri græðgi.
Kveðst riddarinn vera nokkuð vel undirbúinn, en hann hefur æft sig stíft undanfarið á nokkrum smærri sparisjóðum, hraðbönkum og heimabanka móður sinnar.
Hann mun því hefja áhlaupið á höfuðstöðvar Landsbankans í Reykjavík með þar til gerðri lensu klukkan 12 á hádegi, fái hann tilskilin leyfi fyrir reiðskjóta sinn, Lafði Klementínu.
Rjómabollur
Eigum fyrirliggjandi örfáar rjómabollur á frábæru verði - aðeins kr. 100 pr. 10.000 stk. A.v.á.
Það er sérlega ánægjulegt að taka við viðurkenningu fyrir hönd Baggalúts fyrir framúrskarandi rekstur samsteypunnar, og þar með hluti af þeim 2% fyrirtækja sem geta státað af slíkum árangri. Ljóst er að yfirgnæfandi hluti íslensks atvinnulífs er í tómu tjóni og órafjarri frá því að vera framúrskarandi á nokkurn hátt. Mættu þau taka Baggalút og önnur almennileg fyrirtæki sér til fyrirmyndar og hysja upp um sig rekstrarbrækurnar.
Það eru tíu lykilatriði atriði sem hafa komið Baggalúti á þennan eftirsóknarverða stað, sem rétt er að deila með áhugasömum:
- Ekkert starfsfólk
- Engin viðvera
- Ekkert húsnæði
- Engin þjónusta
- Engin gildi
- Engin frí
- Engin áhætta
- Ekkert internetsamband
- Enginn samningsvilji
- Engin kaffivél
Beri önnur fyrirtæki gæfu til að fylgja fordæmi okkar er ljóst að íslenskur fyrirtækjamarkaður yrði skjótt heilbrigðari og næði undraskjótt að skipa sér í fremstu röð í heiminum. En til þess er lítil von, meðan íslenskir stjórnendur eru upp til hópa óhæfar, ákvarðanafælnar gungur með allan sinn rekstur á bólakafi uppi í bakraufinni á sér.
Góðar stundir.