Stundakennara í samfélagsfræðum auðnaðist í vikunni að snúa hópi sjö ára nemenda við ónefndan barnaskóla í Grafarholti til trúar á angólska sólguðinn Nzambi.
„Þetta var nú bara smá tilraun, ég vildi sjá hvað væri hægt að innræta þessum litlu skinnum,“ segir kennarinn, sem undrast hversu auðvelt var að snúa börnunum, sem flest voru kristinnar og/eða jolasveinatrúar.
„Þetta var frekar ísí. Ég las bara fyrir þau nokkrar galdraþulur og dansaði með þeim regndans í löngu frímínútunum. Restina pikkuðu þau svo bara upp á netinu; fórnarathafnirnar, sjálfsdáleiðsluna og allt það dót.“
Í næstu viku mun hann svo freista þess að snúa börnunum til trúar á hindúsku farsótta- og regngyðjuna Mariamman.
Api
28 kg. api fæst gefins. Bítur. Fast. A.v.á.
Það er sérlega ánægjulegt að taka við viðurkenningu fyrir hönd Baggalúts fyrir framúrskarandi rekstur samsteypunnar, og þar með hluti af þeim 2% fyrirtækja sem geta státað af slíkum árangri. Ljóst er að yfirgnæfandi hluti íslensks atvinnulífs er í tómu tjóni og órafjarri frá því að vera framúrskarandi á nokkurn hátt. Mættu þau taka Baggalút og önnur almennileg fyrirtæki sér til fyrirmyndar og hysja upp um sig rekstrarbrækurnar.
Það eru tíu lykilatriði atriði sem hafa komið Baggalúti á þennan eftirsóknarverða stað, sem rétt er að deila með áhugasömum:
- Ekkert starfsfólk
- Engin viðvera
- Ekkert húsnæði
- Engin þjónusta
- Engin gildi
- Engin frí
- Engin áhætta
- Ekkert internetsamband
- Enginn samningsvilji
- Engin kaffivél
Beri önnur fyrirtæki gæfu til að fylgja fordæmi okkar er ljóst að íslenskur fyrirtækjamarkaður yrði skjótt heilbrigðari og næði undraskjótt að skipa sér í fremstu röð í heiminum. En til þess er lítil von, meðan íslenskir stjórnendur eru upp til hópa óhæfar, ákvarðanafælnar gungur með allan sinn rekstur á bólakafi uppi í bakraufinni á sér.
Góðar stundir.