Baggalútur hefur afhjúpað viðamikla svikamyllu innan Landssímans þar sem í ljós hefur komið að Friðrik Pálsson stjórnarformaður Landssímans þáði laun frá sjálfum sér sem greidd voru af Símanum fyrir störf í þágu samgönguráðuneytisins og samþykkt af forstjóra Símans sem fékk umbun frá sjálfum sér sem verktaki á fullum launum hjá dótturfyrirtækjum Símans þar sem hann gegndi stjórnarformennsku og þáði fyrir það laun samþykkt af stjórnarformanni Símans sem starfaði í umboði ráðherra sem aldrei hefur fengið krónu fyrir alla yfirvinnuna sem hann vann vegna sölu Landssímans.
Tapað
tvö karton af auðguðu úrani töpuðust fyrir utan skemmtistaðinn Óliver aðfararnótt laugardags. Finnandi er vinsamlegast beðinn að snúa sér til íranska konsúlsins á Íslandi.
Það er sérlega ánægjulegt að taka við viðurkenningu fyrir hönd Baggalúts fyrir framúrskarandi rekstur samsteypunnar, og þar með hluti af þeim 2% fyrirtækja sem geta státað af slíkum árangri. Ljóst er að yfirgnæfandi hluti íslensks atvinnulífs er í tómu tjóni og órafjarri frá því að vera framúrskarandi á nokkurn hátt. Mættu þau taka Baggalút og önnur almennileg fyrirtæki sér til fyrirmyndar og hysja upp um sig rekstrarbrækurnar.
Það eru tíu lykilatriði atriði sem hafa komið Baggalúti á þennan eftirsóknarverða stað, sem rétt er að deila með áhugasömum:
- Ekkert starfsfólk
- Engin viðvera
- Ekkert húsnæði
- Engin þjónusta
- Engin gildi
- Engin frí
- Engin áhætta
- Ekkert internetsamband
- Enginn samningsvilji
- Engin kaffivél
Beri önnur fyrirtæki gæfu til að fylgja fordæmi okkar er ljóst að íslenskur fyrirtækjamarkaður yrði skjótt heilbrigðari og næði undraskjótt að skipa sér í fremstu röð í heiminum. En til þess er lítil von, meðan íslenskir stjórnendur eru upp til hópa óhæfar, ákvarðanafælnar gungur með allan sinn rekstur á bólakafi uppi í bakraufinni á sér.
Góðar stundir.