Bandaríska alríkislögreglan (FBI) birti í nótt gögn sem sýna ótvírætt hvar bein Jónasar Hallgrímssonar, skálds, er í raun að finna. Leiði Jónasar er samkvæmt gögnunum í sérlegum grafreit FBI í Missouri-fylki þar sem hann er grafinn ásamt öðrum þeim sem fullsannað þykir að hafi komist í kast við, eða verið brottnumdir af geimverum.
„Þjóð ykkar getur verið stolt af Mr. Hallgrimsson, hann er fyrsti Íslendingurinn sem geimverur sýndu áhuga,“ sagði Dr. Phillip Moritz, sérfræðingur. „Það voru gerðar mjög ítralegar tilraunir á honum á sínum tíma og var talið fyrir bestu að skila honum ekki aftur til ykkar - svona í bútum eins og hann var.“
Síðasti séns!
Eigum enn fyrirliggjandi ýmsan erlendan munaðarvarning. Næsta sending væntanleg haustið 2012.
Kringlan
Það er sérlega ánægjulegt að taka við viðurkenningu fyrir hönd Baggalúts fyrir framúrskarandi rekstur samsteypunnar, og þar með hluti af þeim 2% fyrirtækja sem geta státað af slíkum árangri. Ljóst er að yfirgnæfandi hluti íslensks atvinnulífs er í tómu tjóni og órafjarri frá því að vera framúrskarandi á nokkurn hátt. Mættu þau taka Baggalút og önnur almennileg fyrirtæki sér til fyrirmyndar og hysja upp um sig rekstrarbrækurnar.
Það eru tíu lykilatriði atriði sem hafa komið Baggalúti á þennan eftirsóknarverða stað, sem rétt er að deila með áhugasömum:
- Ekkert starfsfólk
- Engin viðvera
- Ekkert húsnæði
- Engin þjónusta
- Engin gildi
- Engin frí
- Engin áhætta
- Ekkert internetsamband
- Enginn samningsvilji
- Engin kaffivél
Beri önnur fyrirtæki gæfu til að fylgja fordæmi okkar er ljóst að íslenskur fyrirtækjamarkaður yrði skjótt heilbrigðari og næði undraskjótt að skipa sér í fremstu röð í heiminum. En til þess er lítil von, meðan íslenskir stjórnendur eru upp til hópa óhæfar, ákvarðanafælnar gungur með allan sinn rekstur á bólakafi uppi í bakraufinni á sér.
Góðar stundir.