Karlmaður á fimmtugsaldri lét til skarar skríða snemma í morgun og framdi valdarán.
Í tilkynningu frá manninum sagði að með athæfinu væri hann að brjótast undan langvarandi kúgun fyrri valdhafa og ná fram langþráðu réttlæti og virðingu – þó ekki væri nema um stundarsakir.
Ránið var fremur smátt í sniðum, en það fólst í því að læsa svefnherbergisdyrum aldraðrar móður valdaræningjans og sturta lyklinum niður um salernisskál – auk þess að kefla afar orðljótan páfagauk, sem þjónaði hlutverki áróðursmeistara á heimilinu.
Uppreisnin hefur nú verið brotin á bak aftur.
Útfrymi
Þarf vegna lífstjörnuflutninga að losa mig við mikið magn útfrymis. Tilboð óskast.
Gísli miðill.
Það er sérlega ánægjulegt að taka við viðurkenningu fyrir hönd Baggalúts fyrir framúrskarandi rekstur samsteypunnar, og þar með hluti af þeim 2% fyrirtækja sem geta státað af slíkum árangri. Ljóst er að yfirgnæfandi hluti íslensks atvinnulífs er í tómu tjóni og órafjarri frá því að vera framúrskarandi á nokkurn hátt. Mættu þau taka Baggalút og önnur almennileg fyrirtæki sér til fyrirmyndar og hysja upp um sig rekstrarbrækurnar.
Það eru tíu lykilatriði atriði sem hafa komið Baggalúti á þennan eftirsóknarverða stað, sem rétt er að deila með áhugasömum:
- Ekkert starfsfólk
- Engin viðvera
- Ekkert húsnæði
- Engin þjónusta
- Engin gildi
- Engin frí
- Engin áhætta
- Ekkert internetsamband
- Enginn samningsvilji
- Engin kaffivél
Beri önnur fyrirtæki gæfu til að fylgja fordæmi okkar er ljóst að íslenskur fyrirtækjamarkaður yrði skjótt heilbrigðari og næði undraskjótt að skipa sér í fremstu röð í heiminum. En til þess er lítil von, meðan íslenskir stjórnendur eru upp til hópa óhæfar, ákvarðanafælnar gungur með allan sinn rekstur á bólakafi uppi í bakraufinni á sér.
Góðar stundir.