Hinn kunni dægurlagasöngvari Þorbjörn Herbertz, eða Bjössi sódó eins og hann er jafnan kallaður, hefur fengið nóg af aðför bankanna eins og hann orðar það. Hann kallar eftir beinum aðgerðum stjórnvalda til hjálpar venjulegu fólki í fjárhagsvanda.
„Já, ég verð að segja það að mér finnst stjórnvöld algerlega hafa brugðist venjulegu fólki eins og mér,“ segir Þorbjörn.
Hann tók 80 milljóna króna myntkörfulán hjá Kaupþingi í Lúxembúrg snemma árs 2007, sem hann notaði til að fjárfesta. Lánið hefur núna tvöfaldast og ljóst að hann getur ekki lengur borgað af láninu.
„Já, ég tók lán til að kaupa bikiní Lindsayar Lohan á uppboði - með veð í bikiníinu. Þetta átti að vera skotheld fjárfesting og hefði verið það ef allar forsendur hefðu ekki skyndilega brostið. Ég vil bara að þetta verði fellt niður. Að minnsta kosti að hluta svo ég geti borgað af láninu. Þetta er náttúrulega bara spurning um sanngirni,“ segir Þorbjörn.
Óska eftir
stúlku/stúlkum til að skemmta sæmilega þekktum Yemenskum kvikmyndaleikstjóra yfir helgina. Gott kaup. A.v.á.
Það er sérlega ánægjulegt að taka við viðurkenningu fyrir hönd Baggalúts fyrir framúrskarandi rekstur samsteypunnar, og þar með hluti af þeim 2% fyrirtækja sem geta státað af slíkum árangri. Ljóst er að yfirgnæfandi hluti íslensks atvinnulífs er í tómu tjóni og órafjarri frá því að vera framúrskarandi á nokkurn hátt. Mættu þau taka Baggalút og önnur almennileg fyrirtæki sér til fyrirmyndar og hysja upp um sig rekstrarbrækurnar.
Það eru tíu lykilatriði atriði sem hafa komið Baggalúti á þennan eftirsóknarverða stað, sem rétt er að deila með áhugasömum:
- Ekkert starfsfólk
- Engin viðvera
- Ekkert húsnæði
- Engin þjónusta
- Engin gildi
- Engin frí
- Engin áhætta
- Ekkert internetsamband
- Enginn samningsvilji
- Engin kaffivél
Beri önnur fyrirtæki gæfu til að fylgja fordæmi okkar er ljóst að íslenskur fyrirtækjamarkaður yrði skjótt heilbrigðari og næði undraskjótt að skipa sér í fremstu röð í heiminum. En til þess er lítil von, meðan íslenskir stjórnendur eru upp til hópa óhæfar, ákvarðanafælnar gungur með allan sinn rekstur á bólakafi uppi í bakraufinni á sér.
Góðar stundir.