Þau hjónin Páll Pálsson og Sirry Sigríðardóttir, sem bæði eru lífeyrisþegar, eru búin að missa þolinmæðina.
„Jú það er rétt, við erum búin að fá nóg,“ segir Páll og steytir hnefa í átt að blaðamanni Baggalúts.
„Jebbs, komin með upp í kok,“ samsinnir eiginkona hans, Sirrý.
„Akkúrat. Við látum ekki bjóða okkur þetta lengur,“ hreytir Páll út úr sér.
„Heyr! Heyr! Það er bara meir en nóg komið af þessu bévítans rugli,“ hvæsir Sirrý og hrækir vænni slummu á gólfið til áhersluauka.
„Okkur ofbýður bara gersamlega aðgerðaleysið,“ bætir Páll við skjálfandi röddu, froðufellandi af reiði.
„Og blöskrar ástandið!“ skrækir Sirrý og lemur niður göngugrindinni sinni af öllu afli.
„Við viljum sjá aðgerðir, strax,“ urrar Páll, teygir sig í nálæga haglabyssu og skálmar af stað í átt að brynvarinni Skoda bifreið þeirra hjóna.
„Og BLÓÐ!“ öskrar Sirrý, grípur tvær bensínsprengjur, skellir þeim á göngugrindina og staulast tifandi á eftir eiginmanni sínum.
Óvissuferð
Æðisleg og æsispennandi óvissuþrenna: Ekvador, Venezúela og Kolumbía. Upplifðu dásemdir Suður-Ameríku! Rauðvín, fögur fljóð og kókaín eins og þú getur í þig látið!
- Lúdóferðir
Það er sérlega ánægjulegt að taka við viðurkenningu fyrir hönd Baggalúts fyrir framúrskarandi rekstur samsteypunnar, og þar með hluti af þeim 2% fyrirtækja sem geta státað af slíkum árangri. Ljóst er að yfirgnæfandi hluti íslensks atvinnulífs er í tómu tjóni og órafjarri frá því að vera framúrskarandi á nokkurn hátt. Mættu þau taka Baggalút og önnur almennileg fyrirtæki sér til fyrirmyndar og hysja upp um sig rekstrarbrækurnar.
Það eru tíu lykilatriði atriði sem hafa komið Baggalúti á þennan eftirsóknarverða stað, sem rétt er að deila með áhugasömum:
- Ekkert starfsfólk
- Engin viðvera
- Ekkert húsnæði
- Engin þjónusta
- Engin gildi
- Engin frí
- Engin áhætta
- Ekkert internetsamband
- Enginn samningsvilji
- Engin kaffivél
Beri önnur fyrirtæki gæfu til að fylgja fordæmi okkar er ljóst að íslenskur fyrirtækjamarkaður yrði skjótt heilbrigðari og næði undraskjótt að skipa sér í fremstu röð í heiminum. En til þess er lítil von, meðan íslenskir stjórnendur eru upp til hópa óhæfar, ákvarðanafælnar gungur með allan sinn rekstur á bólakafi uppi í bakraufinni á sér.
Góðar stundir.