Nú þegar vorar er rétti tíminn til að huga að kannabisreitnum, hreinsa garðinn og bera á. Sífellt fleiri fjölskyldur rækta sitt eigið kannabis, bæði í görðum heimavið og í matjurtagörðum á vegum sveitarfélaganna.
Hermann Herbertsson, kannabisræktarráðunautur hjá Búnaðarsambandi Suðvesturlands, segir að uppskeruhorfur séu óvenjugóðar í ár:
„Jájá, þetta lítur ljómandi vel út,“ segir Hermann. „Það er samt mikilvægt að huga vel að græðlingum og bera duglega á. Og þá er mikilvægt að vera með góðan skít. Góður skítur gefur af sér góðan skít - það er bara þannig.“
Hvítþvottur
Nærðu ekki blóði hinna saklausu úr jakkafötunum? Láttu okkur um að hvítþvo mannorð þitt.
Þvottahús Ming Li Fu
Það er sérlega ánægjulegt að taka við viðurkenningu fyrir hönd Baggalúts fyrir framúrskarandi rekstur samsteypunnar, og þar með hluti af þeim 2% fyrirtækja sem geta státað af slíkum árangri. Ljóst er að yfirgnæfandi hluti íslensks atvinnulífs er í tómu tjóni og órafjarri frá því að vera framúrskarandi á nokkurn hátt. Mættu þau taka Baggalút og önnur almennileg fyrirtæki sér til fyrirmyndar og hysja upp um sig rekstrarbrækurnar.
Það eru tíu lykilatriði atriði sem hafa komið Baggalúti á þennan eftirsóknarverða stað, sem rétt er að deila með áhugasömum:
- Ekkert starfsfólk
- Engin viðvera
- Ekkert húsnæði
- Engin þjónusta
- Engin gildi
- Engin frí
- Engin áhætta
- Ekkert internetsamband
- Enginn samningsvilji
- Engin kaffivél
Beri önnur fyrirtæki gæfu til að fylgja fordæmi okkar er ljóst að íslenskur fyrirtækjamarkaður yrði skjótt heilbrigðari og næði undraskjótt að skipa sér í fremstu röð í heiminum. En til þess er lítil von, meðan íslenskir stjórnendur eru upp til hópa óhæfar, ákvarðanafælnar gungur með allan sinn rekstur á bólakafi uppi í bakraufinni á sér.
Góðar stundir.