Gríðarlegrar óánægju gætir meðal þingmannsefna Sjálfstæðisflokks með skyndiákvörðun flokksforystunnar um að raða kamerúnskum sjimpansöpum í efstu 10 sæti á lista flokksins í öllum kjördæmum.
„Nýlegar kannanir hafa sýnt okkur að það skiptir dygga kjósendur flokksins í sjálfu sér engu máli hvort það eru apar eða önnur spendýr í framboði, við fáum alltaf okkar fasta fjórðung af fylginu,“ segir talsmaður flokksins ákveðinn.
„Þetta er hins vegar talsvert hagkvæmara, ef við gerum ráð fyrir að flokkurinn verði í stjórnarandstöðu á næsta kjörtímabili. Aparnir eru ódýrari í rekstri, þeir eru skemmtilegri, þeir éta minna og geta allflestir ekið sínum eigin bílum.“
Læknadóp
Magnyl! Strepsils! Paracetamol! Benylin! B-Vítamín! Vics! Bonjela! Viox! Acenton! Íbúfen!
Boggi dálkur - Hlemmi
Það er sérlega ánægjulegt að taka við viðurkenningu fyrir hönd Baggalúts fyrir framúrskarandi rekstur samsteypunnar, og þar með hluti af þeim 2% fyrirtækja sem geta státað af slíkum árangri. Ljóst er að yfirgnæfandi hluti íslensks atvinnulífs er í tómu tjóni og órafjarri frá því að vera framúrskarandi á nokkurn hátt. Mættu þau taka Baggalút og önnur almennileg fyrirtæki sér til fyrirmyndar og hysja upp um sig rekstrarbrækurnar.
Það eru tíu lykilatriði atriði sem hafa komið Baggalúti á þennan eftirsóknarverða stað, sem rétt er að deila með áhugasömum:
- Ekkert starfsfólk
- Engin viðvera
- Ekkert húsnæði
- Engin þjónusta
- Engin gildi
- Engin frí
- Engin áhætta
- Ekkert internetsamband
- Enginn samningsvilji
- Engin kaffivél
Beri önnur fyrirtæki gæfu til að fylgja fordæmi okkar er ljóst að íslenskur fyrirtækjamarkaður yrði skjótt heilbrigðari og næði undraskjótt að skipa sér í fremstu röð í heiminum. En til þess er lítil von, meðan íslenskir stjórnendur eru upp til hópa óhæfar, ákvarðanafælnar gungur með allan sinn rekstur á bólakafi uppi í bakraufinni á sér.
Góðar stundir.