Króatísk-norskur auðjöfur, sem ekki vill láta nafns síns getið, hefur tekið upp íslenska krónu í öllum sínum viðskiptum, einhliða.
Segist hann aðallega gera það „upp á flippið“ en einnig sé hann afskaplega hrifinn af þúsundkallinum íslenska, og þá ekki síst Brynjólfi Sveinssyni, biskupi, sem hann segir „getnaðarlegasta bangsa“ sem hann hafi séð og að hann sé „fáránlega 'hott' svona á náttserknum“.
Ekki er fullljóst hvaðan þessi eldhressi spilavítiseigandi hefur fengið allar þær krónur sem hann spreðar nú út um allar koppagrundir, einhliða, né heldur hvað hann er að gera á flunkunýjum Bentley með íslenskum númeraplötum.
Söngnám
Tek að mér einkakennslu í karókísöng. Hef víðtæka reynslu, bæði úr Ölveri, Singstar og Ædolinu. A.v.á.
Það er sérlega ánægjulegt að taka við viðurkenningu fyrir hönd Baggalúts fyrir framúrskarandi rekstur samsteypunnar, og þar með hluti af þeim 2% fyrirtækja sem geta státað af slíkum árangri. Ljóst er að yfirgnæfandi hluti íslensks atvinnulífs er í tómu tjóni og órafjarri frá því að vera framúrskarandi á nokkurn hátt. Mættu þau taka Baggalút og önnur almennileg fyrirtæki sér til fyrirmyndar og hysja upp um sig rekstrarbrækurnar.
Það eru tíu lykilatriði atriði sem hafa komið Baggalúti á þennan eftirsóknarverða stað, sem rétt er að deila með áhugasömum:
- Ekkert starfsfólk
- Engin viðvera
- Ekkert húsnæði
- Engin þjónusta
- Engin gildi
- Engin frí
- Engin áhætta
- Ekkert internetsamband
- Enginn samningsvilji
- Engin kaffivél
Beri önnur fyrirtæki gæfu til að fylgja fordæmi okkar er ljóst að íslenskur fyrirtækjamarkaður yrði skjótt heilbrigðari og næði undraskjótt að skipa sér í fremstu röð í heiminum. En til þess er lítil von, meðan íslenskir stjórnendur eru upp til hópa óhæfar, ákvarðanafælnar gungur með allan sinn rekstur á bólakafi uppi í bakraufinni á sér.
Góðar stundir.