Nígersk-norskur dómsdagsspámaður sem staddur er hér á landi er gáttaður á þeirri svartsýni og bölmóði sem einkennir íslensku þjóðina.
Hann hélt fyrirlestur um yfirvofandi heimsendi í Norræna húsinu í dag og kveðst aldrei hafa fengið jafn jákvæð (eða réttara sagt neikvæð) viðbrögð.
„Fólk bara kokgleypti þetta allt, froskaregnið, hafsuðuna, loftsteininn og meir að segja hindberjaveikispláguna. Það bara sat og kinkaði kolli og kom svo og tók í höndina á mér að skilnaði. Ég hef aldrei vitað annað eins, þetta var eiginlega einum of fyrir minn smekk,“ sagði vesalings maðurinn sem var bersýnilega mjög brugðið.
Ég býð upp á tannlækningu, ókeypis! Vantar fólk að æfa mig á vegna tveggja vikna námskeiðs. Einar Zöega, B.A.
Það er sérlega ánægjulegt að taka við viðurkenningu fyrir hönd Baggalúts fyrir framúrskarandi rekstur samsteypunnar, og þar með hluti af þeim 2% fyrirtækja sem geta státað af slíkum árangri. Ljóst er að yfirgnæfandi hluti íslensks atvinnulífs er í tómu tjóni og órafjarri frá því að vera framúrskarandi á nokkurn hátt. Mættu þau taka Baggalút og önnur almennileg fyrirtæki sér til fyrirmyndar og hysja upp um sig rekstrarbrækurnar.
Það eru tíu lykilatriði atriði sem hafa komið Baggalúti á þennan eftirsóknarverða stað, sem rétt er að deila með áhugasömum:
- Ekkert starfsfólk
- Engin viðvera
- Ekkert húsnæði
- Engin þjónusta
- Engin gildi
- Engin frí
- Engin áhætta
- Ekkert internetsamband
- Enginn samningsvilji
- Engin kaffivél
Beri önnur fyrirtæki gæfu til að fylgja fordæmi okkar er ljóst að íslenskur fyrirtækjamarkaður yrði skjótt heilbrigðari og næði undraskjótt að skipa sér í fremstu röð í heiminum. En til þess er lítil von, meðan íslenskir stjórnendur eru upp til hópa óhæfar, ákvarðanafælnar gungur með allan sinn rekstur á bólakafi uppi í bakraufinni á sér.
Góðar stundir.