Ástæða misskilnings breskra stjórnvalda á orðum Árna M. Mathiesen fjármálaráðherra er fundin. Svo virðist sem Árni, sem er dýralæknir, hafi talað við Darling, hinn ástsæla breska ráðherra, á tungu austur-mexíkóskra dvergprímata. Við nánari athugun hefur komið í ljós að enginn íslensku ráðherranna talar í raun útlensku, utan utanríkisráðherra - sem því miður er lasinn.
Af þessum sökum hefur öllum ráðamönnum þjóðarinnar verið gert að sækja útlenskutíma hjá austurríska tungumálafrömuðinum Dr. Scweitzenhauser. Námskeið Scweitzenhausers tekur ríflega tvær vikur og hefur öllum aðgerðum ríkisstjórnarinnar í efnahagsmálum verið frestað á meðan.
Gefins
allt Roxette safnið, komplett á kasettum. A.v.á.
Það er sérlega ánægjulegt að taka við viðurkenningu fyrir hönd Baggalúts fyrir framúrskarandi rekstur samsteypunnar, og þar með hluti af þeim 2% fyrirtækja sem geta státað af slíkum árangri. Ljóst er að yfirgnæfandi hluti íslensks atvinnulífs er í tómu tjóni og órafjarri frá því að vera framúrskarandi á nokkurn hátt. Mættu þau taka Baggalút og önnur almennileg fyrirtæki sér til fyrirmyndar og hysja upp um sig rekstrarbrækurnar.
Það eru tíu lykilatriði atriði sem hafa komið Baggalúti á þennan eftirsóknarverða stað, sem rétt er að deila með áhugasömum:
- Ekkert starfsfólk
- Engin viðvera
- Ekkert húsnæði
- Engin þjónusta
- Engin gildi
- Engin frí
- Engin áhætta
- Ekkert internetsamband
- Enginn samningsvilji
- Engin kaffivél
Beri önnur fyrirtæki gæfu til að fylgja fordæmi okkar er ljóst að íslenskur fyrirtækjamarkaður yrði skjótt heilbrigðari og næði undraskjótt að skipa sér í fremstu röð í heiminum. En til þess er lítil von, meðan íslenskir stjórnendur eru upp til hópa óhæfar, ákvarðanafælnar gungur með allan sinn rekstur á bólakafi uppi í bakraufinni á sér.
Góðar stundir.