Ein merkasta æla sögunnar er talin hafa fundist um borð í skútu í Ísafjarðarhöfn um helgina. Sigmar Ólafsson tamningamaður fann æluna í gærmorgun, en hann er eigandi skútunnar. Fundurinn kom honum í opna skjöldu.
„Já, nei vá, ég bjóst nú ekki við því að þessi merka æla væri í mínum fórum - það er sko eitt sem er alveg víst sko,“ sagði Sigmar í samtali við Baggalút. „Ég hef leigt þessa skútu forvitnum ferðamönnum undanfarin ár, þeirra á meðal Mick Jagger dægurlagasöngvara og ég geri ráð fyrir að ælan sé frá honum komin. Þetta er voðamikið hann eitthvað.“
Ælan þykir, sem fyrr segir, ein merkasta æla sögunnar - enda hafa hvorki meira né minna en 63 kunnir listamenn kafnað í henni, auk nokkurra stjórnmálamanna og trúarleiðtoga. Þeirra á meðal eru Jimi Hendrix, Marylin Monroe, Indira Ghandi og Olof Palme - svo fáeinir séu nefndir.
Sigmar ætlar að eiga æluna. „...en ég geri nú ráð fyrir að læsa hana inni í skáp svona til öryggis sko,“ segir hann að lokum.
Stúlka óskast
til að geta barn með síðasta íbúa afskekktrar eyjar á Breiðafirði. Gott kaup.
Það er sérlega ánægjulegt að taka við viðurkenningu fyrir hönd Baggalúts fyrir framúrskarandi rekstur samsteypunnar, og þar með hluti af þeim 2% fyrirtækja sem geta státað af slíkum árangri. Ljóst er að yfirgnæfandi hluti íslensks atvinnulífs er í tómu tjóni og órafjarri frá því að vera framúrskarandi á nokkurn hátt. Mættu þau taka Baggalút og önnur almennileg fyrirtæki sér til fyrirmyndar og hysja upp um sig rekstrarbrækurnar.
Það eru tíu lykilatriði atriði sem hafa komið Baggalúti á þennan eftirsóknarverða stað, sem rétt er að deila með áhugasömum:
- Ekkert starfsfólk
- Engin viðvera
- Ekkert húsnæði
- Engin þjónusta
- Engin gildi
- Engin frí
- Engin áhætta
- Ekkert internetsamband
- Enginn samningsvilji
- Engin kaffivél
Beri önnur fyrirtæki gæfu til að fylgja fordæmi okkar er ljóst að íslenskur fyrirtækjamarkaður yrði skjótt heilbrigðari og næði undraskjótt að skipa sér í fremstu röð í heiminum. En til þess er lítil von, meðan íslenskir stjórnendur eru upp til hópa óhæfar, ákvarðanafælnar gungur með allan sinn rekstur á bólakafi uppi í bakraufinni á sér.
Góðar stundir.