Í dag var haldinn stofnfundur nýrra samtaka sem hafa hlotið nafnið Hagsmunasamtök þeirra sem heita Ingvar Helgason en hafa ekkert með bifreiðaumboðið Ingvar Helgason að gera. Er tilgangur samtakanna, eins og nafnið gefur til kynna, að standa vörð um hagsmuni þeirra sem heita Ingvar Helgason en hafa ekkert með bifreiðaumboðið Ingvar Helgason að gera.
„Þetta var bara löngu orðið tímabært,“ sagði Ingvar Helgason, nýkjörinn formaður samtakanna. „Það er ekkert grín að heita Ingvar Helgason en hafa ekkert með bifreiðaumboðið að gera. Fyrir utan að þurfa alltaf að heyra sama brandarann þegar maður kynnir sig fyrir fólki er maður stöðugt að fá símtöl frá fólki sem vill kaupa af manni bíl.“
Strax eftir stofnun samtakanna lagði Ingvar fram tillögu um að þau skyldu þrýsta á bifreiðaumboðið Ingvar Helgason að breyta nafni sínu í IH - svipað og tölvufyrirtækið EJS gerði á sínum tíma - og var sú tillaga samþykkt af báðum hinum meðlimunum.
Hnífasett
áf öllum stærðum og gerðum. Henta vel til hvers konar innbyrðis átaka. A.v.á.
Það er sérlega ánægjulegt að taka við viðurkenningu fyrir hönd Baggalúts fyrir framúrskarandi rekstur samsteypunnar, og þar með hluti af þeim 2% fyrirtækja sem geta státað af slíkum árangri. Ljóst er að yfirgnæfandi hluti íslensks atvinnulífs er í tómu tjóni og órafjarri frá því að vera framúrskarandi á nokkurn hátt. Mættu þau taka Baggalút og önnur almennileg fyrirtæki sér til fyrirmyndar og hysja upp um sig rekstrarbrækurnar.
Það eru tíu lykilatriði atriði sem hafa komið Baggalúti á þennan eftirsóknarverða stað, sem rétt er að deila með áhugasömum:
- Ekkert starfsfólk
- Engin viðvera
- Ekkert húsnæði
- Engin þjónusta
- Engin gildi
- Engin frí
- Engin áhætta
- Ekkert internetsamband
- Enginn samningsvilji
- Engin kaffivél
Beri önnur fyrirtæki gæfu til að fylgja fordæmi okkar er ljóst að íslenskur fyrirtækjamarkaður yrði skjótt heilbrigðari og næði undraskjótt að skipa sér í fremstu röð í heiminum. En til þess er lítil von, meðan íslenskir stjórnendur eru upp til hópa óhæfar, ákvarðanafælnar gungur með allan sinn rekstur á bólakafi uppi í bakraufinni á sér.
Góðar stundir.